Хагассайн өдрийн 07:40 цагийн үед Төв аймгийн Эрдэнэ сумын нутаг, Баяндавааны адаг замд Сүхбаатар аймгаас Улаанбаатар хотын чиглэлд явсан хот хоорондын зорчигч тээврийн үйлчилгээний “Дайчин сүх” ХХК-ний "Hyundai Bus" маркийн 0522 СҮА дугаарын автобус замын хажуу руу онхолдсон зам тээврийн ноцтой хэрэг гарсаныг бид шуурхай мэдээлсэн. Ослын улмаас 6 хүн нас барж, 44 хүн гэмтсэн. Одоогоор ослын шалтгааныг тогтоох, хохирогчдын эрүүл мэндийг анхаарах ажлын хэсэг байгуулагдан ажиллаж байна. Энэхүү ажлын хэсэг өчигдөр өдөр хуралдаж  ослоос болж гэмтсэн иргэдийн биеийн байдалд анхаарлаа хандуулж, эрүүл мэндийн яаралтай тусламж авах талаар ярилцсан юм.

Одоогоор хоёр хүн сэхээнд, найман хүн нуруу нугасны тасагт, есөн хүн тархины тасагт хэвтэж эмчлүүлж байна.  Зам тээврийн дэд сайд Х.Ержанаар ахлуулсан ажлын хэсэг хохирогчдын эрүүл мэндийг хамгаалах, тэдэнд учирсан хохирлыг барагдуулах арга хэмжээ авч ажиллаж байна. Улмаар гэмтсэн иргэдтэй уулзаж даатгалын асуудлыг яаралтай шийдвэрлэх гэж байгаа аж.