Өнгөрсөн сарын 31-нд МАХН-ын гишүүн, Хууль зүйн яамны дэд сайд Э.Эрдэнэжамъянд холбогдох шүүх хурал болж, түүнд 12.8 сая төгрөгийн торгууль ноогдуулж, хоёр жил улс төрийн алба хашихгүй байх шийдвэрийг гаргасан. Гэвч тэрбээр шүүхийн шийдвэрийг хүлээн зөвшөөрөхгүй давж заалдсан. Харин Давж заалдах шүүхээс түүнийг бас гэмт буруутайд үзэж дээрх шийдвэрийг хэвээр үлдээсэн.

Хоёр шатны шүүхээс ийм шийдвэр гарсаар байтал дэд сайдын өмгөөлөгч хийгээд тэрбээр өөрөө шүүхийн шийдвэртэй санал нийлэхгүй байгаа. Тиймээс ч шүүхийн шийдвэрийг биелүүлэхгүй албан тушаалаа үргэлжлүүлэн хашиж, ажлаа хийсээр байгаа.

Тэгвэл энэ шийдвэртэй МАХН-ынхан ч санал нийлэхгүй байгаа аж. Шүүхийн шийдвэрийн талбаар МАХН-ын Ерөнхий нарийн бичгийн дарга Г.Шийлэгдамба хэлэхдээ "Шүүхийн хоёр удаагийн шатны шийдвэрээр хууль зөрчсөн гэж үзсэн. Гэвч өөрөө болон өмгөөлөгч нь хүлээн зөвшөөрөхгүй байгаа. Бид үүсээд байгаа нөхцөл байдалтай холбогдуулан улс төрийн ашиг сонирхолын холбоотой асуудал яваад байна гэж үзэж байгаа. Тиймээс хууль хяналтын байгууллага үнэн зөвийг тогтооно гэж найдаж байна" гэв.