Эдийн засгийн хөгжлийн яамны Төрийн нарийн бичгийн дарга Б.Шинэбаатарын өрөөнөөс чагнах төхөөрөмж илэрсэн талаарх мэдээлэл өнгөрсөн баасан гаригт гарсан. Тэгвэл энэ талаар Эдийн засгийн хөгжлийн яамны төрийн нөрийн бичгийн дарга Б.Шинэбаатар дөнгөж сая мэдээлэл хийлээ. Тэрбээр "Гурван сарын өмнө миний өрөөны таазны шохой, шавар уначихсан байсан тохиолдол гарсан. Мөн дараа нь ханын будаг халцарсан байсан. Тухайн үед нь би анзааралгүй цэвэрлэгчээ буудаж цэвэрлүүлчихээд л явж байсан. Энэ үзэгдэл өнгөрсөн тав дахь өдөр мөн гарсан. Тэгэхээр нь би сайд Н.Батбаяр руу залгаад болсон үйл явдлыг хэлтэл намайг холбогдох газарт нь хандахыг зөвлөсөн. Тэгээд би ТЕГ-т хандсан. ТЕГ-ынхан миний өрөөнд шалгалт хийгээд чагнах төхөөрөмж, камер илрүүлсэн байгаа. Миний ажлын өрөөнд чагнах төхөөрөмж тавьсаныг би хууль бус гэж үзэж байгаа. Тиймээс ТЕГ-т гомдол гаргасан. Мөрдөн шалгах явж үргэлжилж байгаа. Хэн, ямар зорилготойгоор тавьсаныг удахгүй шалгаж тогтоох байх. Ер нь миний өрөөнд улс оны эдийн засагтай холбоотой зүйлүүд л яригддаг. Түүнээс биш ноцтой асуудлууд яригдаагүй" гэсэн юм.
Мөн тэрбээр өөрийгөө насаараа төрд үнэнчээр ажилласан, тагнуулж, мөрдүүлээд байх хэрэг хийгээгүй гэлээ. ТЕГ-ынхан одоогоор Эдийн засгийн хөгжлийн яамны өөр бусад өрөөнд шалгалт явуулаагүй байна.
Мэдээлэл хийсний дараа түүнээс зарим зүйлийг тодрууллаа.
-Өрөөний аль хэсгээс камер, чагнах төхөөрөмж гарсан юм бэ?Мэдээлэл хийсний дараа түүнээс зарим зүйлийг тодрууллаа.
-Тагнуулаас шалгаж байгаа учраас байршлыг нь нарийн хэлэх боломжгүй.
-Танд ямар нэгэн хардлага байгаа юу?
-Хаанаас тавьсныг мэдэхгүй. Хууль хяналтынхан тогтоох биз.
-Авлигатай тэмцэх газраас тавьсан байх гэсэн мэдээллийг эх сурвалжууд өгч байгаа. Тус газраас таныг шалгах үндэслэл байгаа юу?
-Надад АТГ шалгуулах хэмжээнд хийсэн зүйл байхгүй. Би төрд үнэнч шударгаар ажиллаж ирсэн хүн. Миний өрөөнд ямар нэгэн ноцтой зүйл яригдаагүй. Иргэдээ ингэж тагнаж чагнаж байгаа нь хууль бус. Хэрвээ ингээд байвал хэн төрд ажиллах юм бэ.
-Ерөнхий сайд энэ үйл явдлын дараагаар яамдын төрийн нарийн бичгийн дарга нарыг өрөөндөө дуудсан гэсэн. Тэнд юу яригдсан бол. Магадгүй бусад төрийн нарийн бичгийн дарга нарын өрөөнд үзлэг хийх асуудал хөндөгдсөн үү?
-Ерөнхий сайд өрөөндөө уулзсан эсэхийг мэдээгүй. Би өөрөө очоогүй болохоор энэ талаар мэдээлэл өгч чадахгүй нь.
-Төрийн байгууллагууд харуул хамгаалал, камертай байгаа. Урьдчилсан байдлаар танай яамны камерыг шүүсэн болов уу?
- Яамдууд бол төрийн хамгаалалтанд байдаг тусгай обьект. Гэтэл үүнийг үл ойшоон ийм зүйл хийж байгааг гайхаж байна. Холбогдох байгууллагуудаас шалгасан л байх. Энэ талаар мэдээлэл алга.
Т.Хулан
Сэтгэгдэл (4)