Өмнөх тоглолтуудаас хоёр удаа ялалт байгуулсан Колумбын баг Японыг 4:1-ийн харьцаатайгаар бут ниргэжээ. Колумб есөн оноотойгоор хэсгээ тэргүүлж, Азийн аварга Япон сүүл мушгисан байна. Колумбын шигшээ багийн шилдэг довтлогч Радамел Фалкао бэртлийн улмаас тэмцээнд оролцоогүй ч чамгүй амжилт гаргажээ. Колумбын дасгалжуулагч Хосе Пекермэн “Бид маш чанга баг гэдгээ харуулж чадлаа. Одоо хүн бүр бидний тоглож чаддагийг мэддэг боллоо” хэмээн ярьсан байна. Дараагийн удаа тэд шилдэг довтолгоотой гэгдэж буй Уругвайн шигшээ багтай тоглоно. Харин Японы багийн хувьд аль хэдийнэ нутаг буцсан бөгөөд дасгалжуулагч Альберто Заччерони эхний хоёр тоглолтонд амжилтгүй оролцсон учир хариуцлагаа хүлээнэ гэв.