Нийслэлийн прокурорын газар болон Дүүргийн 1, 2-р прокурорын газраас Хэвлэл мэдээллийн хэрэгсэлээр нийтэд мэдээлэгдсэн нийт 31  хэргийн талаар сэтгүүлчдэд мэдээлэл хийж сонирхсон асуултанд нь хариулт өглөө.

Мэдээллийг Нийслэлийн прокурорын орлогч Ц.Батболд, Дүүргийн 1-р прокурорын газрын прокурор Д.Энхтөр, Дүүргийн 2-р прокурорын газрын прокурор Б.Баян-Очир нар хийж хурлын эхэнд статистик тоон мэдээллийн талаар дурдсан юм.

Нийслэл, Дүүргийн прокурорын газруудаас 2014 оны эхний 6 сарын байдлаар  хэрэг бүртгэлт, мөрдөн байцаалтын ажиллагаа явуулсан 1497 эрүүгийн хэргийг яллах дүгнэлт үйлдэн шүүхэд шилжүүлж шийдвэрлүүлсэн байна.

Шүүхэд шилжүүлсэн хэргийг зүйл ангиар авч үзвэл:

- танхайн гэмт хэрэг 271 буюу 18 хувь,

- хүний амь насыг санаатай хохироох гэмт хэрэг 67 буюу 4,5 хувь,

- мансууруулах болон сэтгэцэд нөлөөлөх эм бэлтгэх, олж авах, хадгалах, тээвэрлэх, илгээх, борлуулах гэмт хэрэг 17 буюу 1 хувь,

- бусдын эд хөрөнгө залилан мэхэлж авах гэмт хэрэг 113 буюу 7,5 хувь

- бусдын эд хөрөнгийг дээрэмдэх гэмт хэрэг  95 буюу 6 хувь

- бусдын эд хөрөнгийг хулгайлах гэмт хэрэг 259 буюу 17 хувь

- Төрийн албан тушаалтан албаны эрх мэдэл буюу албан тушаалын байдлаа урвуулах гэмт хэрэг 9 буюу 0,6 хувийг эзэлж байгаа бөгөөд бусад зүйл ангиар үйлдэгдсэн гэмт хэрэг 666 буюу 45,4 хувь байна.