Г.Сарангэрэл гэх эмэгтэй хар тамхины хэргээр хорих ангид 4 сар гаруйн хугацаанд хоригдож гарч ирээд шууд л телевизэд яриа өгөв. Энэ нь  түүний талаар "томчуудын хэрүүлийн золиос, нэг нэгнээ чадах гэсэн эрх баригдчын зохион байгуулалттай хэрэгт гэм буруугүй байж холбогдчихлоо" гэж бодож байсан иргэдийн бодлыг шал өөр зүгт "эргүүлэв". Угтаа тэрбээр ийм үйлдлийг сонгосон нь өөрийгөө өмгөөлж, харин Х.Тэмүүжин, О.Баасанхүү нарын үнэн нүүр царайг илчлэх гэсэн чин эрмэлзэл байсан гэх. Гэвч Г.Сарангэрэл  хэвлэл мэдээллийн хэрэгслээр хэлж ярьсан болгондоо өөрийгөө биеэ үнэлэгч мэтээр, мөн хар тамхи санамсаргүйгээр хэрэглэсэн ч байж магадгүй байдлаар олонд ойлгуулав. Энэ нь үнэхээр бүсгүй шокийн байдлаасаа гараагүй худал зүйл ярьсан уу, эсвэл угаасаа хамаг үнэнийг туугаад хаячихсан уу гэдэг дээр олон нийтийг зүйл бүрийн асуулттай үлдэхэд хүргэв.

Юутай ч түүний санаатай, санаандгүй  хэлж ярьсан болгон нь сүүлийн өдрүүдэд нийгэмд, тэр дундаа мэдээлэлтэй хөл зэрэгцэн алхадаг иргэдийн дунд яахын аргагүй "сенсаац" болж орхилоо. Г.Сарангэрэл ч өөрийгөө сенсаац тарьсаныг мэдсэн үү яасан ярилцлага авая гэж хандсан болгонд нааштай хариу өгч хэвлэл мэдээллийн суваг бүрээр л түүний ярилцлага цацагдаж эхэллээ. Харин тэрбээр ярилцлага өгөх бүртээ санаа бодлоо өөрчилж өмнөх ярьсанаа үгүйсгэж, дахин үнэн худал нь мэдэгдэхгүй юм ярьж байгаа нь хачирхалтай юм.

Өөрөөр хэлбэл, Х.Тэмүүжин сайдтай бэлгийн харьцаатай байсан мэтээр эхэлж ярьсанаа дараагийн ярилцлагууддаа зүгээр л танидаг нэгэн боллоо. Мөн хар тамхи хэрэглэх бүү хэл ямар зүйл байдгийг мэдэхгүй гэж байснаа бидний худалдаж авч, хэрэглэсэн зүйл хар  тамхи байсан эсэхийг мэдээгүй болж хувирлаа.

Түүнчлэн, цагдаагийн байгууллагад өгсөн анхны мэдүүлгээрээ хар тамхи хэрэглэсэн мэтээр айж сандарч ярьсан. Харин одоо бол хоригдоод ирэхээр ямар хэцүүг мэдэрч үнэнийг ярьж байна гэх мэт өөрийгөө ороох зүйл ярьсаар байгаа юм.

Түүнчлэн, түүний аав, өмгөөлөгчийн зүгээс хамт байсан бүдүүн тарган охид нь турах зорилгоор мансууруулах төрлийн зүйл хэрэглэсэн байж мэдэх юм гэж ярьсан нь угаас тэд нийлж хар тамхины төрлийн зүйл хэрэглэсэн байж магадгүй гэсэн сэтгэгдлийг олон нийтийн дунд төрүүлээд авсан юм.

Ийн ярих ярихгүй зүйл ярьж олонд худал үнэн нь мэдэгдэхгүй ойлголт төрүүлж байгаа тэдэнд бухимдах иргэд ч цөөнгүй байна гэдгийг энэ дашрамд хэлэх нь зүйтэй биз ээ.

Ер нь 17 насандаа эрэгтэй хүнээс мөнгө санхүүжилт авч өвөр түрүүнд нь орж явсан гэж өөрөө ярьж мэдээлсэн хэрнээ би нэр төрөө сэргээлгэмээр байна. Намайг гүтгэж, доромжилсон О.Баасанхүү гэгчид гомдолтой байна гэж ярих нь ч хэр зохиомжтой юм.

Мөн цагдаагийн байгууллагаас хамгийн анх Баянгол дүүрэгт охид хар тамхи татаж байгаад баригдлаа гэх албаны мэдээллийг цацсан байхад чухам ямар учраас О.Баасанхүү гишүүнийг хамгийн анх олон нийтэд цацсан мэтээр ярьж, 10 тэрбумыг нэхэмжилж байгаа юм гэдэг дээр ч хэргийг анхааралтай ажиж суугаа ард иргэд шүүмжлэлтэй хандаж байна.

Энэ байдлаас болж зарим иргэд хүнээс мөнгө шантаажлаад сурчихсан мэтээр Г.Сарангэрэлийн талаар тодорхойлолттой болж үлдэж байгаа юм.

Цаашид энэ бүсгүй хуулийн байгууллагад сандарсандаа худал мэдүүлэг өгч, хэвлэл мэдээллийнхэнд ч шокийн байдалтайгаар яриа өгсөөр байх уу?

 Манай хэвлэл мэдээллийнхэн ч гэсэн өөрийгөө "од" мэтээр төсөөлсөн хэн нэгэн этгээдээс үнэн худал нь мэдэгдэхгүй ярилцага авахаа цөөрүүлж, харин сандарсандаа худлаа яриад буй "хүүхэддээ" өмгөөлөгч хийгээд ар гэрийнхэн нь ч сургамж хайрлах нь зүйтэй болов уу.

Шоконд орсон, сэтгэлзүйн асуудалтай байгаа нэгнээс худал хуурмаг мэдээлэл ард иргэдэд цацаж тархи угаадаг хэрэгсэл биш учир бодит үнэнийг хүүрнэлээ.