Улсын Дээд шүүхийн хяналтын шатны эрүүгийн хэргийн шүүх хуралдаанаар Ц.Мөнхбаяр, Д.Төмөрбаатар, С.Дашцэрэн, Г.Болдбаатар, Ж.Ганболд, М.Мөнхболд нарт холбогдох эрүүгийн хэргийг ялтнууд болон тэдгээрийн өмгөөлөгч нарын гаргасан гомдлын дагуу 2014 оны 6 дугаар сарын 27-ны өдөр хянан хэлэлцлээ.

Ц.Мөнхбаяр, Д.Төмөрбаатар, Г.Болдбаатар, С.Дашцэрэн, Ж.Ганболд нар нь зохион байгуулалттайгаар бүлэглэн Засгийн газраас УИХ-д өргөн барсан хуулийн төслийг 30 минутын дотор УИХ-аас татаж авахуулах, өөрсдийн боловсруулсан “Хуулийн хэрэгжилтийг хангах тухай” Засгийн газрын тогтоолын төслийг 1 цагийн дотор батлуулах шаардлага тавьж, ийнхүү шийдвэр гаргуулахад шууд нөлөөлөх зорилгоор 2013 оны 9 дүгээр сарын 16-ны өдөр “Централ” тауэр, “Уул уурхайн” яамны гадна тротил буюу тэсэрч дэлбэрэх бодис байрлуулан, улмаар Төрийн ордны хашаан дотор буу, сум, гранат зэрэг галт зэвсэг, байлдааны галт хэрэгсэл хэрэглэн олон нийтэд айдас төрүүлэхэд чиглэсэн нийтэд аюултай хүч хэрэглэсэн буюу хүч хэрэглэхээр заналхийлсэн гэмт хэрэгт холбогджээ. Мөн Ц.Мөнхбаяр, Г.Болдбаатар, Ж.Ганболд нар нь зохион байгуулалттайгаар бүлэглэн байлдааны галт хэрэгсэл хууль бусаар худалдан авч бэлтгэсэн, хадгалсан, авч явсан гэмт хэрэгт холбогдсон байна.  Түүнчлэн М.Мөнхболд нь Дорнод аймгийн Чулуунхороот сумын Дэлгэр багийн нутаг дэвсгэрт орших өөрийн гэрт галт зэвсэг, байлдааны галт хэрэгсэл, тэсэрч дэлбэрэх бодисыг хадгалсан гэмт хэрэгт тус тус холбогджээ.