Нийслэлийн III Амаржих газрын эмч нарын хариуцлагагүй байдлаас болж 31 настай Э.Хонгорзул бүсгүй жил гаруй хугацаанд хэвлийдээ марльтай явснаас нарийн гэдэс үгжирч муудан улмаас гэдсээ тайруулсан байдаг. Ийн эмч нарын буруутай үйлдлээс болж эрүүл саруул байсан Э.Хонгорзул бүсгүй хэвтэрт орж, өтгөн шингэнээ хэвлийд нь байрлуулсан уутаар гаргаж, хагас жил орчим эмнэлгээс эмнэлэг дамжин тарчилсан. Тэгвэл уг асуудал эрүүгийн хэрэг үүсгэн, мөрдөн байцаалтын ажиллагааг явуулж эхэлсэн бөгөөд өнгөрсөн гуравдугаар сарын 31-нд дүүргийн нэгдүгээр прокурорын газраас Ц.Оюунгэрэл, Д.Батзаяа, Д.Ганчимэг нарт Монгол Улсын Эрүүгийн хуулийн тусгай ангийн 106 дугаар зүйлийн 106.2 дахь хэсэгт зааснаар яллах дүгнэлт үйлдэн шүүхэд шилжүүлжээ. Тэгвэл өнгөрсөн баасан гаригт дүүргийн эрүүгийн хэргийн анхан шатны I шүүх дээрх хэргийг хэлэлцээд эх барих эмэгтэйчүүдийн эмч Ц.Оюунгэрэл, эх барих эмэгтэйчүүдийн эмч Д.Батзаяа, сувилагч Д.Ганчимэг нарыг гэм буруутайд  тооцож, тэдний эмчлэх үйл ажиллагаа явуулах эрхийг нэг жилийн хугацаагаар хасаж нэг жилийн хугацаагаар тус тус тэнсэн харгалзах ял оногдуулжээ.