УИХ-ын гишүүн асан, Хилийн боомтын захиргааны дарга Л.Гүндалай “Энэрэл хайр хүүхдийн төлөө” ТББ-ыг үүсгэн байгуулж, өдгөө хүүхдийн төлөө ажилд идэвхийлэн оролцож байгаа талаар бид мэдээлсэн. Тэгвэл уяач хүүхдийн төлөө, хүний эрх ярьж яваа гишүүний увиагүй үйлдлийг зарим иргэд шүүмжилж байна. Тодруулбал, Л.Гүндалайгийн эгч Л.Оюундалайгийн хүү Одсүрэн нар Зайсан буюу Хан-Уул дүүргийн 11 дүгээр хорооны иргэдийн орон гэрийг хүч хэрэглэн буулгаж, газрын дээрмийг хийж байгаа аж. Энэ байдлаас болж  Л.Гүндалайг хамаатан садантайгаа нийлж айлын голомт руу халддаг болсон уу хэмээн шүүмжилж байгаа юм.

Өнгөрсөн даваа гаригт л гэхэд тус хорооны иргэн Л.Оюун-Эрдэнийн гэрийг эзэнгүй байхад нь буулгаж байгаа үйл явдлыг ойр хавийн оршин суугчид ийн баримтжуулж авсан байна. Өдгөө иргэн Л.Оюун-Эрдэнэ гэрээ ч барих эрх мэдэлгүй болж,  гэрээ манан гадаа хонож байгаа бөгөөд цаашид өлсгөлөн зарлахаа мэдэгдээд байна.
Түүнчлэн энэ асуудлаар өнөөдөр иргэд хэвлэлийн хурал хийлээ. Энэ үеэр гэрээ нураалгаж, эд зүйлээ сүйтгүүлсэн Б.Алтанчимэгээс зарим зүйлийг тодрууллаа.

-Та бүхэн Зайсанд хэзээнээс амьдарч эхэлсэн хүмүүс вэ?

-Бид зайсанд өсөж торнисон хүмүүс.  Манай Л.Оюун-Эрдэнийн хувьд тэр газар 2008 оноос хойш амьдарч эхэлсэн байгаа. Тодруулбал, Загджав даргын өгсөн газрын гэрчилгээгээ үндэслээд тэнд амьдарч байна. Тухайн үед Л.Гүндалай 7.5 га газартай байсан. Гэтэл кадастрын зургаа сунгаж татуулаад доохон талд нь байрлах Л.Оюун-Эрдэнэ рүү дайрч эхэлсэн. Л.Гүндалайд бол ашиглах гэрчилгээ байдаг боловч тэр нь баталгаажаагүй. Л.Оюун-Эрдэнэд бол Загджав даргын гаргасан гэрчилгээ байдаг боловч энэ нь шүүхдээд явахаар хууль бус болчихоол байгаа. Өөрөөр хэлбэл, Богд уул дархан цаазтай гэдгээрээ хууль бус болчихоод байдаг. Гэтэл адилхан иргэд байхад Л.Гүндалайд Чингисийн зурагнаас наашхи газрыг өгөөд байдаг. Энгийн иргэд өөрсдийн гэрийн буйраа баталгаажуулж чаддагүй. Ийм л байдалтай байна.

-Л.Гүндалай 7.5 га газраа эзэмшихийн тулд айл гэрийн үймүүлээд байгаа гэсэн үг үү?

-Анх 7.5 га газар байсан. Тэрнээсээ зарж борлуулсаар одоо 5 га газар болсон. Бид бол 0.33 га газартай л иргэд. Ерөөсөө л нэг гэрийн буйр. Тэнд тухайн үед кадастрын зураг хийгдээгүй учир хэмжээ байдаггүй.

-Л.Гүндалай айлуудыг хүчээр буулгаж байна гэх юм. Хэдэн айл үүнд нь өртөөд байгаа юм?

-Хоёр айл өртөж байгаа. Манай буйрин дээр шороо асгаад би шороон дотор амьдарч байгаад хүүхэд төрөх гээд хойд талын айлынхаа буйран дээр буучихсан.

-Тэнд Л.Гүндалай гишүүн асан ямар үйл ажиллагаа явуулахгэж байгаа юм бол?

-“Сонгдо” шиг эмнэлэг барих юм гэсэн. Гэхдээ зөвшөөрөлгүй юм чин ямар юм аа бариулах вэ дээ. Уг нь гурвалсан гэрээгээр зөвшөөрлөө авах ёстой. Гэтэл Л.Гүндалай хаанаас, ямар аргаар баталгаагүй зөвшөөрөл оршин суугчдад харуулаад байгааг ойлгохгүй байна.

-Одоо ер нь тэр хавьд хэчнээн айл өрх байна?

-Арваад айл байгаагаас 5 айлын орц, гарцыг хаасан. Тэдгээр айлууд бүгд суулт зарласан байгаа. Айлуудын  орц, гарцыг нь хааж хашаа барьсан. Тухайд үед бид эвдлээд орчихсон. Гэтэл шүүхэд гомдол гаргасан. Харин тэр нь хэрэгсэхгүй болсон. Сая тог тасаллаа. Удалгүй биднийг эзэнгүй байхад олон арван залуучуудаар гэр буулгуулсан. Энэ талаар цагдаагийн байгууллагад гомдол гаргасан. Гэтэл цагдаагийн байгууллагад Л.Гүндалай өөрөө оччихсон наад хүмүүсээ явуул гээд л сууж байна лээ. Энэ сарын 24-нөөс хойш байнга хамгаалалттай байгаа. Бүх тавилга, эд зүйл эвдэрсэн.