UBS телевизийн санаачлан хэрэгжүүлж байгаа “Улс төрд шинэ манлайлагч” зорилтот тв төслийн сурвалжлах хэсгүүд эх орны дөрвөн зүг найман зовхист ажиллаж, залуусын санаа бодлыг сонсч, төслийнхөө ач холбогдлыг танилцуулсаар байна. Хойд зүгийн аймгуудаар томилогдсон сурвалжлах хэсэг Сэлэнгэ аймгийн Алтанбулаг, Сүхбаатар сумнаас бэлтгэсэн мэдээллээ ирүүллээ. Монгол орны торгон хил, эх орны маань тусгаар тогтнолын түүхийн алтан өлгий болсон хязгаар нутгийг сахин амьдарч байгаа ард иргэддээ талархахаас аргагүй. Залуу хүн бүхэн хот суурин бараадаж, хөгжил цэцэглэлтийг сонгох хүсэл сонирхолтой ч энэ нутгийн уугуул залуучууд хот газар мэдлэг боловсрол эзэмшээд орон нутагтаа эргэн ирж, ажил хөдөлмөр эрхлэх сонирхол төдийлөн буураагүй. Гэвч төрийн албаны ажлын байр тоотой, үйлдвэрлэл, аж ахуйн нэгж хангалттай бус, баялаг бүтээх, бизнес үйлдвэрлэл хөгжөөгүй зэрэг шалтгаанаар залуучуудад ажлын байр дутмаг байна. Энэ тал дээр сумын удирдлага анхаарч, орон нутгийнхаа залуучуудын нийгмийн хөгжил, олон нийтийн оролцоог дэмжиж ажилладаг. Бид Алтанбулаг дахь хилийн заставт алба хааж байгаа цэрэг, дайчидтайгаа уулзаж, санаа бодлыг нь сонслоо. Цэргийн албанд ирээд эр хүний хувьд төлөвшиж, их зүйлийг боддог болсон гэж цэрэг дайчид ярьж байна. Хугацаат цэргийн албаа амжилттай хаагаад төслийнхөө дараагийн дугаарт шинэ санаа, идэвх зүтгэлээрээ оролцох хүсэлтэй байгаагаа ч илэрхийлсэн. Төслийн маань гол цөм нь Монгол орны бүх аймаг, нийслэл, сум дүүргээс болон дэлхийн олон оронд ажиллаж амьдарч байгаа 22-40 насны Монгол улсын иргэн, оролцогч залуус маань юм. Аливаа зүйлийг өөр өнцгөөс харж, өөрийн үнэлэлт дүгнэлтийг хийж, бусадтай үзэл бодлоо уралдуулах сонирхолтой, чадвартай залуусыг төслийн удирдамж, нэвтрүүлгийн журмын дагуу тодруулан, төслийн туршид тусгай даалгавар, сургалтаар хөгжүүлж, эцсийн дүнд зорилгоо зөв тодорхойлсон, тэмүүлэлтэй шинэ үеийнхнийг бий болгохоор зорьж байгаа. Төслийн үргэлжлэх хугацаа ганц жил. Шилдэг 90 оролцогчийн нэгээр сонгогдлоо гэхэд шилдгийн шилдэг оролцогч, шинэ манлайлагчаар тодортлоо есөн сарын хугацааг өөрийн цаг заваасаа зарцуулах юм. Энэ хугацааны талаар нэлээд бодож байгаа тухайгаа ч хэлж байна. Мөн насны хязгаарлалтыг эргэн харж, 18 аас дээш насныхан оролцох боломжоор хангахыг хүсчээ. Ийнхүү Монгол орны аймаг бүрт хүрч, сумын иргэд залуучуудын санаа бодлыг сонсох боломжийг бүрдүүлж, Монголын нийгэм, улс төр, эдийн засгийн салбарт цоо шинэ сэтгэлгээний манлайлал бий болгох шинэ үеийн залуусыг тодруулах “УЛС ТӨРД ШИНЭ МАНЛАЙЛАГЧ” зорилтот ТВ-ийн төслийг хэрэгжүүлэхэд хамтран ажиллаж байгаа EBI хүрээлэн, Монгол сан, Liberal House бодлогын судалгааны хүрээлэнд талархал илэрхийлье.