Сүхбаатар дүүрэгт байрлах Хоёрдугаар сургуулийн сурагчид өнгөрсөн баасан гаригт хичээлийнхээ завсарлагаанаар нэгнийхээ хоолойг боож, ухаан алдуулж тогложээ. Улмаар ангийнхаа 12 настай Н гэгч хүүг самбарынхаа урд гарган, хүзүүг нь хоёр алгаараа боон ухаан алдуулсан байна.

Харамсалтай нь хүү ухаан алдан унасан ч дахин сэрээгүй байна. Хүүг амиа алдсаныг мэдмэгц ангийнхан нь сургуулийнхаа хашаанд амиа егүүтгэсэн байдалтай гаргаад орхижээ. Харин сургуулийн удирдлагуудын зүгээс тухайн өдрийн 16.00 цагт гэрийнхэн рүү утасдаж, “Хүүгийн бие тааруу байна. Сургууль дээр хурдан ир” гэж залгажээ. Улмаар хүүгийн ээж сургууль дээр очсон боловч хүү нь аль хэдийнэ нас барсан байжээ.

Цагдаагийн байгууллага хэргийг шалгаж байгаа бөгөөд хүүг амиа хорлосон гэж тогтоогоод байгаа аж. Харин ар гэрийнхнийх нь хувьд үүнийг хүлээн зөвшөөрөхгүй, гомдолтой байгаа юм.

Мөн  Улаанбаатарын цагдаагийн газрын Хүүхдийн хэлтсийнхэн сургуулиудад шалгалт явуулахад тус  сургууль нь “School police” хөтөлбөрийн хэрэгжилт хангалтгүйгээс янз бүрийн гэмт хэрэг гарах нөхцөл үүссэн байжээ. Тухайлбал, тус сургуулийн ойр орчмоор согтуу хөлчүү хүмүүс цугларч архи, тамхи хэрэглэх зэрэг явдал түгээмэл ажиглагдаж байсан гэнэ. Тиймээс энэ талаарх албан бичгээ Нийслэлийн боловсролын газрын даргад хүргүүлээд байжээ.