-
2015 оны 12 сарын 10
шинэ мэдээ
prev
“ ЦЭГЭЭН” НУУРАНД ЖИВСЭН АЧААНЫ АВТОМАШИНЫГ ГАРГАЛАА
/ 2015/12/10
“ ЦЭГЭЭН” НУУРАНД ЖИВСЭН АЧААНЫ АВТОМАШИНЫГ ГАРГАЛАА
2015 оны 11 дүгээр сарын 24-ний өдрийн 17:30 цагт Булган аймгийн Баян-Агт сумын харьяат иргэн Б.Цогтмагнай 38-99 БУА улсын дугаартай ЗИЛ-130 загварын автомашинаар хөлдөж гүйцээгүй нуурын мөсөн дээгүүр зорчиж яваад живсэн тухай дуудлагаар тус аймгийн Онцгой байдлын газрын Эрэн хайх, аврах салбарын дарга ахлах дэслэгч Ж.Лхагважаргалын ахалсан 9 албан хаагч 11 дүгээр сарын 25-ны өдрөөс 12 дугаар сарын 04-ний өдөр хүртэл 10 хоног ажиллаж автомашиныг нуурын гүнээс гаргаж эзэнд нь хүлээлгэж өгөв.
-
2015 оны 12 сарын 10
Нийслэлийн Засаг даргын санаачилгаар Нийслэлийн Засаг даргын Тамгын газар Азийн сантай хамтран Улаанбаатар хотод анх удаа “Иргэдийн оролцоо-Хотын маргааш” Зөвлөлдөх санал асуулга 2015 оны 12 дугаар сарын 12, 13-ны өдөр Төрийн ордны Их танхимд зохион байгуулна. Зөвлөлдөх санал асуулгаар нийслэлээс хэрэгжүүлэх урт хугацааны 14 томоохон төсөл хөтөлбөрийг иргэдэд танилцуулж, тэдний санал тус бүрийг тусгах бөгөөд санал асуулгын бэлтгэл ажил явагдаж байна. Тус үйл ажиллагаанд оролцогчдод хэлэлцүүлэх сэдвийг тодорхойлж, тэдгээрийн танилцуулга үнэн зөв, тэгш тэнцвэртэй байх нөхцөлийг хангах, хэлэлцүүлгийн үр дүнг дүгнэх ерөнхий чиг үүргийг хэрэгжүүлэх Зөвлөлдөх Санал Асуулгын Зөвлөх хороог байгуулсан бөгөөд өнөөдөр сэтгүүлчдэд мэдээлэл өглөө.
Хэвлэлийн бага хуралд Нийслэлийн Засаг даргын Тамгын газрын дарга Ё.Гэрэлчулуун, Стэнфордын Их сургуулийн Зөвлөлдөх ардчиллын хүрээлэнгийн захирал, Профессор Жэймс С.Фишкин, тус хүрээлэнгийн ахлах зөвлөх, Зөвлөх хорооны хамтын дарга Г.Занданшатар, Зөвлөх хороог төлөөлж Гандантэгчинлэн хийдийн Хамба лам Д.Чойжамц нар оролцлоо.
Хурлын эхэнд нийслэлийн ЗДТГ-ын дарга Ё.Гэрэлчулуун “Улаанбаатар хотод анх удаа зохион байгуулах гэж буй “Иргэдийн оролцоо-Хотын маргааш” Зөвлөлдөх санал асуулгын бэлтгэл ажил бүрэн хангагдсан” гэдгийг хэллээ.
Стэнфордын Их сургуулийн Зөвлөлдөх ардчиллын хүрээлэнгийн ахлах зөвлөх, Зөвлөх хорооны хамтын дарга Г.Занданшатар “Нийслэлийн Засаг дарга Э.Бат-Үүлийн санаачилгаар зохион байгуулж буй Зөвлөлдөх санал асуулгыг ямар нэгэн улс төрийн нам хамааралгүйгээр зохион байгуулж байгаагаараа онцлог. Монгол Улсын нийслэл Улаанбаатар хотын цаашдын бүтээн байгуулалт, хөгжил цэцэглэл тэд иргэдийн саналыг тусган, тэдний оролцоог хангах нь Зөвлөлдөх ардчиллын хамгийн чухал зүйл юм. Тиймээс нийслэлийн иргэдийг төлөөлж санамсаргүй байдлаар сонгогдсон 400 иргэн энэ чухал үйл ажиллагаанд идэвхтэй, хариуцлагатай оролцохыг уриалж байна” хэмээн онцлон хэлсэн юм.
Стэнфордын Их сургуулийн Зөвлөлдөх ардчиллын хүрээлэнгийн захирал, Профессор Жэймс С.Фишкин “Зөвлөлдөх санал асуулгыг дэлхийн 23 улсын 40 гаруй хотод амжилттай явуулж тухайн хотын багагүй асуудлыг иргэдтэй зөвлөлдөн шийдвэрлэсэн. Тиймээс Улаанбаатар хотод хэрэгжүүлэх урт хугацааны төсөл хөтөлбөрт анх удаа иргэдийн саналыг авахаар болсон нь маш чухал алхам болж байна. Нийслэлийн иргэдийг санамсаргүй сонгогдсон 400 иргэн төлөөлөх бүрэн боломжтой бөгөөд тодорхой үр дүн гарна гэж найдаж байна” гэлээ.
Зөвлөх хорооны бүрэлдэхүүнд төр нийгэм, иргэний нийгмийн байгууллагын нэрт зүтгэлтнүүд, бизнес, урлагийн төлөөлөл ажиллаж байгаа бөгөөд иргэдийнхээ саналыг авч, зөвлөлдөхөөр ажиллаж буй тус үйл ажиллагааг бүрэн дэмжиж буйгаа илэрхийлсэн юм.
Зөвлөх хорооны гишүүдээр:
- Монгол Улсын Ерөнхий сайд асан Д.Содном
-Гадаад хэргийн сайд асан Ц.Гомбосүрэн
-Хас банкны ТУЗ-ийн дарга Ч.Ганболд
-Монгол Улсын шинжлэх ухааны гавъяат зүтгэлтэн Философийн ухааны доктор, профессор Б.Даш-Ёндон
- Гандантэгчинлэн хийдийн Хамба лам Д.Чойжамц
- Монголын Урлагийн зөвлөлийн гүйцэтгэх зөвлөлТ.Ариунаа
- MCS группын Ерөнхийлөгч Ж.Од
-Нийтлэлч Б.Батбаяр
- Алтан тариа ХК-ийн захирал П.Цэнгүүн
- Монфэмнэт Үндэсний сүлжээ ТББ-ын ахлах зөвлөх Д.Сүхжаргалмаа
- МУИС-ийн Ректор Р.Бат-Эрдэнэ
- Азийн сангийн Монгол дахь суурин төлөөлөгч Мелони Линдберг нар ажиллаж байна.
“Иргэдийн оролцоо-Хотын маргааш” Зөвлөлдөх санал асуулга 12 дугаар сарын 12-ны 09 цагаас Төрийн ордны Их танхимд болно гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2015 оны 12 сарын 10
Эрчим хүчний зохицуулах хорооноос гэр хорооллын айл өрхүүдийн цахилгааны төлбөрийг шөнийн цагт 50хувиар хөнгөлөх шийдвэр гаргасан билээ. Үүнтэй холбогдуулан зарим айл өрх өмнөх сарын цахшгааны төлбөрөө хэрхэн шийдвэрлэх талаар сонирхсон юм. Иргэдийн сонирхсон зарим асуултад Эрчим хүчний зохицуулах хороо хариулж байна.
-Манайх цахилгааны төлбөрийн өртэй. Энэ тохиол- долд өр телбөрөө хэсэгчлэн төлж болдог уу?
-Хэрэглэгчдэд үйлчлэх төвийн авлага барагдуулах хэсгийн ажилтантай уулзаж, авлага хэсэгчлэн барагдуулах гэрээ хийж болно. Харин дэг жаягийн дагуу үлдэгдэл төлбөрийн 30 хувьтай тэнцэх төлбөрийг урьдчилан хийсэн байх ёстой. Үүний дараа залгалтын хураамжаа төлж цахилгаанаа залгуулна. Гэрээний төлбөр төлөгдөж байгаа нөхцөлд та хэдийгээр өртэй ч цахилгаанаа таслуулахгүй байх боломж гэрээ хийснээр үүсч байгаа юм.
-Манай цахилгааныг хэлэхгүйгээр тасалсан байна, хаана хандах вэ?
-Аж ахуйн нэгж, байгууллагуудад гар утасны мессежээр урьдчилан сануулах мэдэгдэл өгдөг бөгөөд танай байгууллагын гэрээн дээр заасан утас руу бид мессеж илгээсэн байна. Хэрэв таны энэ утас өөрчлөгдсөн бол бид одоо мэдээллийн бааздаа залруулга хийе. Утсаа солигдсон тохиолдолд компанийн Хэрэглэгчдэд үйлчлэх төвөөр дамжуулан мэдэгдэж байна уу.
-Нийтээрээ цахилгаан тасарсан үед хаана хандах вэ. 24 цагаар ажилладаг газрынхаа утсыг өгөөч?
• Баянзүрх, Чингэлтэй, Сүхбаатар дүүрэгт амьдардаг бол Зүүн түгээх төвд хандаарай. Утас: 353570
• Сонгинохайрхан, Хан-Уул, Баянгол дүүрэгт амьдардаг бол Баруун түгээх төвд хандаарай. Утас: 345909
Амралтын өдрүүдэд: “УБЦТС” ХК-ийн Төв диспетчерт хандаарай. Утас: 343048,343004
-Орон сууцны айл хоёр тарифт тоолуур тавиулмаар байна. Хаана хандах вэ?
-Эрчим хүчний зохицуулах газрын зохицуулагчдын зөвлөлийн 2011 оны дөрөвдүгээр сарын 12-ны өдрийн 11 тоот тогтоолоор айл өрхөд борлуулах цахилгааны тарифыг шинэчлэн баталсан. Иймд шинээр хоёр тарифт тоолуур тавиулах бол хангагч компанидаа хүсэлтээ гаргах нь зүйтэй.
-Цахилгааны хөнгөлөлтөд ямар бүлгийн иргэд хамрагдах вэ?
• Цахилгааны хөнгөлөлтөд байнгын асаргаа шаардлагатай ахмад настан, тэжээн тэтгэх төрөл садангүй бөгөөд бие даан амьдрах чадваргүй ахмад настан,
• Нэн ядуу хүн-тухайн хүнд ногдох орлогын хэмжээ нь амьжиргааны доод түвшингийн 40 хувиас доогуур, тэрхүү орлогынхоо хэмжээгээр хязгаарлагдмал хэрэглээтэй хүн,
• Олон хүүхэдтэй өрх толгойлсон эх, эцэг-ядуу, нэн
ядуу амьдралтай дөрөв болон түүнээс дээш хүүхэдтэй өрх
толгойлсон эх, эцэг,
• Хөгжлийн бэрхшээлтэй иргэн-төрөлхийн болон удамшлын эмгэг өөрчлөлт, эсхүл осол, гэмтлийн улмаас сэтгэц, оюун ухаан, мэдрэхүйн чадавх нь алдагдсан, түүнчлэн бие эрхтэн нь гэмтсэнээс хөдөлмөрлөх, бие даан амьдрах боломж нь хязгаарлагдсан хүн хамрагдана.
-
2015 оны 12 сарын 10
Нэгдсэн Үндэстний Байгууллагын Ерөнхий Ассамблей улс орнууд нийтээр дагаж мөрдөх хүний эрх, эрх чөлөөний стандартыг тодорхойлсон Хүний Эрхийн Түгээмэл Тунхаглалыг 1948 оны 12 дугаар сарын 10-ны өдөр батлан, 1950 оноос энэ өдрийг “Хүний эрхийн өдөр” болгон тэмдэглэхийг уриалсан билээ. Энэ жил энэ өдрийг дэлхий нийтээр “Бидний эрх, эрх чөлөө мөнх байг” уриатайгаар тэмдэглэж байна.
НҮБ-ын гишүүн орны хувьд МУ-д хүний эрх, эрх чөлөөг хангах нь МУ-ын ЗГ-ын үндсэн үүрэг бөгөөд төрийн үүрэг ачаанаас үүрэлцэж буй ХҮНИЙ ЭРХИЙГ ХАМГААЛАГЧДЫН ЭРХ, АЮУЛГҮЙ БАЙДЛЫГ ХАНГАХ нь нэн тулгамдсан асуудал юм. Олон улсын хэмжээнд өөрийн болон хэн нэгний эрх, эрх чөлөөг хангах, хамгаалах, хохирлыг барагдуулахын төлөө тэмцэж байгаа хүн бүрийг хүний эрхийн хамгаалагч хэмээн үзэж, төрөөс тэдний аюулгүй байдал, үйл ажиллагааны баталгааг хангах ёстой хэмээн үздэг.
Харин манай улсад хүний эрхийг хамгаалагчдыг хамгаалах үүрэгтэй УИХ, ЗГ үндсэн үүргээ мэдэхгүй, хэрэгжүүлж чадахгүй байгаагийн улмаас тэднийг айлган сүрдүүлэх, заналхийлэх, дайрч довтлох, гүтгэх, хуурамч хэрэг үүсгэх, хорьж цагдах, ял шийтгэл оногдуулах, тэр ч бүү хэл амь насыг нь хохироох боллоо. Үүний тод жишээ бол байгаль хамгаалагч, биологич Төмөрсүхийн Лхагвасүмбэрэл бөгөөд тэрээр Монгол орныхоо нэн ховор амьтдын нэг болох ирвэсийн амьдрах орчныг уул уурхайн лицензийн талбайгаас хамгаалан тууштай тэмцсэнээр, гэмт хэргийн бүлэглэлийн удаа дараагийн шахалт дарамтад өртөж, учир битүүлгээр амь үрэгдсэнд хүний эрхийн хамгаалагчид бид харамсч байна.
Иймд нийтийн эрх ашгийн төлөөх зорилго чиглэл бүхий ТББ-уудын төлөөллөөс бүрддэг Хүний эрхийн ТББ-уудын Форум, Монголын байгаль орчны иргэний зөвлөлийн хүний эрхийн хамгаалагчид энэ жилийн Хүний эрхийн өдрийг хүний эрхийг хамгаалагч гэж хэн болох, Монгол Улс дах хүний эрхийг хамгаалагчдын аюулгүй байдал, үйл ажиллагааны баталгаа ямар байгаа талаар өөрсдийн байр суурийг олон нийтэд хүргэх, ОУ-ы гэрээ тунхаглаар хүлээсэн ЗГ-ын үүрэг 1\ “Хүний эрхийн зөрчлийн хохирогчдын гомдлыг бодитой барагдуулах; 2\ Хүний эрхийн зөрчлийн гомдлыг шуурхай, хараат бусаар мөрдөн шалгах; 3\ Тунхаглалд тусгагдсан хууль ёсны эрх үүргээ хэрэгжүүлсэнтэй нь холбогдуулан хүний эрхийн хамгаалагчдыг хүчирхийлэх, заналхийлэх, өшөө авах, ялгаварлан гадуурхах, дарамтлах болон бусад дур зоргын ажиллагаанаас хамгаалаах бүхий л арга хэмжээ авах”ыг-заасан ЗГ-ын үүргийг нь мэдүүлж, төрөөс хүний эрхийг хамгаалагчдын эрхийг баталгаажуулахыг шаардах зорилгоор “Бидний эрх, эрх чөлөө мөнх байг” сэдэвт нээлттэй цуглааныг зохион байгуулж байна. Тус цуглааны үеэр хүний эрхийг хамгаалагчдын аюулгүй байдал, үйл ажиллагааны баталгааг хангах эрх зүйн орчин бүрдүүлэх тухай ЗГ-т хүргүүлэх Шаардлагад гарын үсэг цуглуулна.
Мөн түүнчлэн УИХ, ЗГ-ын бодлого, үйл ажиллагаа хүний эрхэд суурилаагүйн улмаас хүний эрх, эрх чөлөө зөрчигдөхөд хүрч, улмаар ардчиллын хөгжилд ухралт гарах эрсдэл дагуулж байгааг хүний эрхийн ТББ-ууд уриа, зурагт хуудсаар илэрхийлэн харуулах болно.
Нийтийн ашиг сонирхол, хүний эрхийг хамгаалагчдын амь нас аюулгүй байж, үр дүнтэй ажиллах эрх зүйн орчин бүрдүүлэх төрийн үүргийг Монгол Улсын Засгийн газарт сануулан ШААРДАХ БОЛНО.
Хүний эрхийн хамгаалагчид
-
2015 оны 12 сарын 10
Цагдаагийн байгууллагад өнгөрөгч хоногт хулгайн 50 гэмт хэрэг бүртгэгдсэн байна. Тэдгээрээс эд зүйлээ алдсан дуудлагыг цаг алдалгүй өгсөн болон эргүүлийн үүрэг гүйцэтгэж байсан цагдаагийн алба хаагчид сэжиг бүхий этгээдийг шалгаснаар 20-иод гэмт хэргийн эзэн холбогдогчийг олж, тогтоон харьяа дүүргийн цагдаагийн хэлтсүүдэд шалгалтын ажиллагаа явагдаж байна.
Шинэ жилийн баяр дөхсөн, өвлийн улирал эхэлж жолооч нар автомашиндаа өвлийн дугуй, дулаан хучлага зэрэг үнэд хүрэхүйц эд зүйлсийг ашиглах болсон нь хулгайн хэрэг нэмэгдэх шалтгаан болж байгааг цагдаагийн алба хаагчид хэлэв.
Хоногт гарч буй хулгайн хэргийн олонх нь автомашины хучлагын хулгай байна. Жижиг тэрэгний хучлага хамгийн доод тал нь 100 мянган төгрөгийн үнэтэй. Хулгайчид эд зүйлээ алдсан иргэд эдийн засгийн болоод сэтгэл санааны хохирол амсдаг. Тухайлбал, Баянгол дүүргийн цагдаагийн хэлтсийн алба хаагчид үүрэг гүйцэтгэж байхдаа сэжиг бүхий этгээдийг шалгаж, бусдын автомашины хучлага хулгайлсан байсныг илрүүлж, автомашины дулаан хучлагаа хулгайд алдснаа мэдээгүй байсан жолоочийг дуудан, хүлээлгэж өгчээ. Энэ тухай автомашин, хучлаганы эзэн өөрийн фэйсбүүкээрээ дамжуулан цагдаад талархал илэрхийлсэн байсан.
Аливаа баяр ёслолын өмнө хулгайн гэмт хэрэг ердийнхөөс өсдөг. Иймд иргэд алдсан өөрийн өмч хөрөнгө, эд зүйлдээ тавих анхаарлаа сайжруулах, хулгайн гэмт хэргийн хохирогч болсон тохиолдолд тэр даруй цагдаагийн байгууллагад хандахыг анхааруулж байна. Цаг алдалгүй цагдаад мэдэгдсэн тохиолдолд гэмт этгээдийг олж илрүүлэхэд илүү дөхөм болох юм.
-
2015 оны 12 сарын 10
СБД-ийн нутаг Энхтайваны өргөн чөлөө, 103-н гарцанд Нийслэлийн зорчигч тээврийн нэгтгэлийн ”Ecobus J -800” маркийн авто машины жолооч Ч нь зорчигч 69 настай эмэгтэй С-г унагаж гэмтээжээ.
-
2015 оны 12 сарын 10
2015 оны 12 дугаар сарын 09-ны өдөр Улаанбаатар хотын Замын цагдаагийн газрын ЖШУХ дээр нийт 377 дуудлага мэдээ мэдээлэл хүлээн авснаас зам тээврийн ослын 327 дуудлага бүртгэгдсэн байна. Үүнээс ХАБАЖЭГХэрэг 11 бүртгэгдэж 11 хүн хүнд хөнгөн гэмтсэн үүнээс жолооч-2, явган зорчигч-8, зорчигч-1. Хүүхэд зам тээврийн осолд өртсөн 1 үүнээс сургуулийн өмнөх насны 0, сургуулийн насны 1, согтууруулах ундааны зүйл хэрэглэсэн үедээ хөдөлгөөнд оролцож осолд өртсөн жолооч 0, явган зорчигч 2. Согтуугаар тээврийн хэрэгсэл жолоодсон 79 жолоочийг журамлан гарч болзошгүй осол хэргээс урьдчилан сэргийлсэн.
-
2015 оны 12 сарын 10
Бага ангийн сурагчид энэ сарын 22-ноос амарна
-
2015 оны 12 сарын 10
Шүүхийн шинжилгээний үндэсний хүрээлэнгээс маргааш иргэдэд зориулж нээлттэй хаалганы өдөрлөг зохион байгуулахаар болжээ. Тус байгуулага нь Хууль зүйн сайдын 2012 оны А/15 дугаар тушаалаар баталсан “Хууль зүйн салбарын нээлттэй бодлого”, Шүүхийн шинжилгээний үндэсний хүрээлэнгийн захирлын “Журам батлах тухай” А/452 дугаар тушаал, Шүүхийн шинжилгэний байгууллагын энэ оны төлөвлөгөөнд тусгагдсаны дагуу ил тод нээлттэй байдлыг хангах, үйл ажиллагаагаа олон нийтэд сурталчлах зорилготой дээрх өдөрлөгийг зохион байгуулна. Тус арга хэмжээгээр иргэдэд дараахь үйлчилгээнүүдийг үзүүлнэ.
-
2015 оны 12 сарын 10
Нийслэлийн Засаг даргын 2015 оны “Зохион байгуулалтын арга хэмжээ авах тухай” А/76 дугаар захирамж, нийслэлийн Онцгой байдлын газрын даргын “Нийслэлийн нутаг дэвсгэрийн хэмжээнд барилга байгууламж, гэр хороолол, авто зам, нийтийн эзэмшлийн зам талбайн авралтын гарцыг шалгах тухай” А/101 дүгээр тушаалыг хэрэгжүүлэх ажлын хүрээнд нийслэлийн Онцгой байдлын газраас томилогдсон хоёр ажлын хэсгийн гишүүд есөн дүүрэгт 2015 оны 10 дугаар сарын 28-ны өдрөөс 11 дүгээр сарын 23-ны өдрүүдэд ажиллажээ.
Шалгалтыг нийслэлийн Онцгой байдлын газар, дүүргүүдийн Засаг даргын Тамгын газар, Онцгой байдлын хэлтэс, Өмч, газрын харилцааны алба, Дэд бүтэц, тохижилтын хэлтэс, Цагдаагийн хэлтэс, Замын Цагдаагийн тасаг, хороодын Засаг дарга, холбогдох албан тушаалтан, мэргэжилтэн нар хамтран хийсэн байна. Тэд нийслэлийн нутаг дэвсгэрийн хэмжээнд барилга байгууламж, гэр хороолол, авто зам, нийтийн эзэмшлийн зам талбайн авралтын гарцыг хааж, болзошгүй гамшгийн үед шуурхай албаны автомашин хүрэлцэн очих боломжийг хязгаарлаж, зөвшөөрөлгүй барьж сунгасан хашаа, хаалт, хайсыг буулгаж чөлөөлжээ.
Дээрхи ажлын хүрээнд дүүргийн Засаг дарга нар захирамж гарган ажлын хэсгийг байгуулж, зөвшөөрөлгүй барьж сунгасан хашаа, хаалт, хайсыг буулгаж чөлөөлөхөд шаардлагатай 7.100.000 төгрөгийг шийдвэрлэн зам гарцыг чөлөөлөх ажилд зарцуулж, тус арга хэмжээнд мэргэжлийн байгууллагуудаас 158 хүн, 10 техник хэрэгсэлтэйгээр ажилласан байна.
Шалгалтаар нийт 603 объектыг хамруулан шалгасанаас Баянгол дүүрэгт 75, Чингэлтэй дүүрэгт 30, Хан-Уул дүүрэгт 35, Сүхбаатар дүүрэгт 41, Баянзүрх дүүрэгт 329, Сонгинохайрхан дүүрэгт 64, Налайх дүүрэгт 19, Багануур дүүрэгт 4, Багахангай дүүрэгт 6 объект тус тус хамрагджээ. Шалгалтаар нийслэлийн авто зам, нийтийн эзэмшлийн зам талбайн авралтын гарцыг хааж, зөвшөөрөлгүй барьж сунгасан 63 байршилд иргэн, аж ахуйн нэгж байгууллагын хашаа, хаалт, хайсыг тус тус чөлөөлж, гамшгийн голомтонд ажиллах шуурхай албаны автомашин зорчих зам гарцыг нээсэн бөгөөд аврах үйл ажиллагаа явуулах нөхцөлийг бүрдүүлсэн байна.
-
2015 оны 12 сарын 10
Байрны цэвэрлэгээ муу, дээврээс ус байнга гоождог, хаалга цоож эвдэрхий, гадаах тохижилт, лифт засахгүй байна гэх мэт СӨХ-тэй холбоотой гомдол Шударга өрсөлдөөн, хэрэглэгчийн төлөө газарт байнга ирдэг бөгөөд өнгөрсөн 4,5 дугаар сард Нийслэл хотын хамгийн их СӨХ-тэй хороо болох БГД-ийн СӨХ-уудад хяналт шалгалт, судалгааны ажлыг хийсэн билээ.
Орчин цагийн хүмүүсийн амьдралын хэв маяг, завгүй байдлаас иргэд СӨХ-ийнхөө үйл ажиллагаанд тогтмол оролцож амжихгүй, төлбөр мөнгөний асуудал тодорхой бус байгаагаас оршин суугчид болон СӨХ хоёрын дунд үл ойлголцох асуудал гарсаар байна.
Дээрх ажлын хүрээнд Шударга өрсөлдөөн, хэрэглэгчийн төлөө газрын санаачлагаар Сууц өмчлөгчдийн холбоодыг дэмжиж, үйл ажиллагааг нь ил тод байлган иргэддээ хүрч ажиллах мөн ус, дулаан, цахилгаан гэх мэт төлбөр тооцоо гээд СӨХ-тэй холбоо бүхий асуудлуудын мэдээ, мэдээллийг ойлгомжтой байлгах үндсэн дээр МАНАЙ СӨХ facebook хуудсыг нээж өгөх арга хэмжээг зохион байгууллаа.
Энэ хүрээнд тус дүүрэгт уг хөтөлбөрийг хэрэгжүүлэн маш үр бүтээлтэй ажиллаж байгаа “Сенатор”, “Мажестик” СӨХ-үүдийн үйл ажиллагааны туршлагыг хуваалцаж иргэдийг хэрхэн хамруулах, уг группт хэрхэн нэгдэх талаарх зааварчилгаа, зөвлөмжийг өгөхөөс гадна дээрх туршлага уг дүүрэгт амжилттай хэрэгжиж чадвал цаашид Нийслэлийн бүх дүүргийн СӨХ-үүдэд хэрэгжүүлэхээр төлөвлөж байгаа юм байна.
Дашрамд дурдахад та facebook хаягтай л бол өөрийн СӨХ-ны нэрийг латинаар бичихэд гарч ирэх бөгөөд ингэснээр та өөрийн группдээ нэгдэж боломжтой болох юм.
-
2015 оны 12 сарын 10
Нийслэлийн Иргэдийн Төлөөлөгчдийн Хурлын Тэргүүлэгчдийн 61,63-р тогтоолын дагуу иргэн, аж ахуйн нэгж байгууллагууд эзэмшил, ашиглалтад байгаа газар болон орчныхоо 50 м хүртэлх нийтийн эзэмшлийн зам талбайн хальтиргаа гулгааг арилган, цэвэрлэгээ,тохижилт засвар үйлчилгээ хамгаалалтыг нь хариуцах үүрэгтэй.
Энэхүү тогтоолыг хэрэгжүүлэх зорилгоор Хан-Уул дүүрэг 220 иргэн, аж ахуйн нэгж байгууллагуудтай орчныхоо 50м хүртлэх нийтийн эзэмшлийн зам талбай, ногоон байгууламжийг хариуцан, эд хөрөнгийн ашиглалт, засвар үйлчилгээ хамгаалалтыг хариуцах заалт бүхий гэрээг байгуулсан байна. Гэрээний заалтыг биелүүлээгүй аж ахуйн нэгж иргэдэд Худалдаа, үйлдвэрлэл, үйлчилгээ эрхлэх тусгай зөвшөөрлийг нь сунгахгүй байх хүртэл хариуцлага тооцон ажиллаж байгаа юм. Мөн Баянгол дүүрэг 50м газрын хог хаягдал, цас мөсний цэвэрлэгээ, хальтиргаа гулгааг арилгах шаардлагыг 28 аж ахуйн нэгж байгууллагуудад хүргүүлж, 26 зөрчлийг арилган ажиллажээ. Тус дүүргийн 23 олон нийтийн байцаагч сарын хугацаанд цэвэрлэгээ үйлчилгээ хийгээгүй, хог тарьсан 315 иргэн, аж ахуйн нэгжийн зөрчлийг илрүүлж, тэмдэглэл үйлдсэн байна.
Харин Чингэлтэй дүүргийн 13 байцаагч тохижилт цэвэрлэгээ хийгээгүй долоон аж ахуйн нэгжийн талаарх зөрчлийн тэмдэглэл үйлдэж дүүргийнхээ Засаг даргын тамгын газарт хүргүүлжээ. Цаашид орчныхоо 50 м газрыг цэвэрлээгүй аж ахуйн нэгжийг дүүргийн Засаг даргын захирамжаар хороодод томилогдсон олон нийтийг байцаагч газар дээр нь шалгана. Гэрээ зөрчсөн аж ахуйн нэгжүүдэд олон нийтийн байцаагч нар зөрчлийн тэмдэглэл хөтлөн мэргэжлийн хяналтын байцаагч нарт мэдэгдсэнээр хариуцлага тооцох юм гэж Улаанбаатар хотын Захирагчийн ажлын албанаас мэдээллээ.
-
2015 оны 12 сарын 10
2015 оны цахим газар өмчлөлийн 5-р ээлж 2015 оны 12-р сарын 14-ний өдрийн 12 цагт эхэлнэ. Энэ удаагийн цахим газар өмчлөлд шинээр Сүхбаатар дүүргийн Тоосгоны 1-р хэсгийн 16 нэгж талбарт, тоосгоны 2-р хэсгийн 149 нэгж талбарт, Баянзүрх дүүргийн Шарын аманд 204 нэгж талбарт иргэдэд цахим хэлбэрээр газар өмчлүүлнэ.
Мөн 1,2,3,4-р ээлжинд хамрагдсан Баянзүрх, Хан-Уул, Сонгинохайрхан, Багануур, Багахангай дүүргийн нутаг дэвсгэрт нийт 4016 нэгж талбарт цахим газар өмчлөлийг явуулахаар боллоо гэж Нийслэлийн Өмчийн харилцааны газраас мэдээллээ.
-
2015 оны 12 сарын 10
Нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат “Төлөвлөгөө батлах тухай” А/942 дугаар захирамж гаргалаа. Захирамжаар нийслэлийн ИТХ-ын Тэргүүлэгчдийн 187 дугаар тогтоолоор баталсан “Гэртээ харих зам” хөтөлбөрийг хэрэгжүүлэх үйл ажиллагааны нэгдсэн төлөвлөгөөг баталлаа. Төлөвлөгөөний дагуу Гэр оронгүй тэнэмэл амьдралтай иргэдийг тоолох, мэдээллийн сантай тулгалт хийх, мэдээллийн санг тодотгох, Сургуульд хамрагдаагүй хүүхэд, иргэнийг зохих шатны боловсрол эзэмшүүлж, сургууль, цэцэрлэгт хамруулах, Хөдөлмөрийн чадвартай иргэдийг ”Цэвэрлэгээ, тохижилтын бригад”-аар дамжуулан нийтийг хамарсан ажилд оролцуулах, Хөдөлмөр эрхэлж, бие даан амьдрах чадвартай болсон иргэдийг байгууллагуудад хариуцуулж дэмжүүлэх, гэр бүлд нь нэгтгэх, өөрсдийн хүчээр хямд өртөгтэй орон байртай болоход нь дэмжлэг үзүүлэх зэрэг ажлыг зохион байгуулна. Мөн Хотын төв хэсгээр тэнэх, олон нийтийн газар байрлах, хонох, хооллох, гуйлга гуйхыг хориглох, Халдварт өвчтэй иргэдийг тусгаарлаж, албадан эмчлэх, Хүүхдээ тэнэмэл байдалд хүргэсэн эцэг эхэд Гэр бүлийн тухай хууль, Хүүхдийн эрхийг хамгаалах тухай хуулийн дагуу хариуцлага хүлээлгэх юм.
“Гэртээ харих зам” хөтөлбөрийг хэрэгжүүлэх ажлыг зохион байгуулах, мэргэжлийн удирдлагаар ханган ажиллахыг нийслэлийн Нийгмийн халамж, үйлчилгээний газарт, дүүргийн хэмжээнд хөтөлбөрийг хэрэгжүүлэх, уг үйл ажиллагаанд зарцуулагдах хөрөнгийг жил бүрийн орон нутгийн төсөвт тусгуулж ажиллахыг дүүргийн Засаг дарга нарт үүрэг болгов.
Хөтөлбөрийн хэрэгжилтэд хяналт тавьж ажиллахыг нийслэлийн Засаг даргын Хөдөлмөр эрхлэлт, нийгмийн хамгааллын асуудал эрхэлсэн орлогч Ц.Буяндалайд даалгалаа гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2015 оны 12 сарын 10
Нийслэлийн ИТХ-ын Тэргүүлэгчдийн ээлжит хуралдаан маргааш буюу 2015 оны 12 дугаар сарын 11-ны Баасан гарагт болно. Хуралдаанаар нийслэлийн өмчийн хэд хэдэн барилга байгууламжийг бүртгэн авах, балансаас балансад шилжүүлэх асуудлыг хэлэлцэхээс гадна “Нийслэлийн нутаг дэвсгэрт согтууруулах ундаа худалдах, түүгээр үйлчлэх тусгай зөвшөөрөл олгох, хяналт тавих журам”-ыг хэлэлцэх юм. Мөн нийслэлд тээврийн хэрэгслийг зориулалтын авто машинаар зөөж шилжүүлэх, түр саатуулах хашаа/байр/ ажиллуулах, үйл ажиллагааны төлбөрийн хувь хэмжээг тогтоох тухай, “Соёл урлагийн сургалт цэнгээнт үйлчилгээний журам” батлах тухай, Монгол наадам цогцолборын хэсэгчилсэн ерөнхий төлөвлөгөө батлах тухай, “Бичил бизнесийн сангийн журам”-д өөрчлөлт оруулах тухай зэрэг асуудлыг хэлэлцэнэ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2015 оны 12 сарын 10
Улаанбаатар хотын хэмжээнд 12-р сарын 09-ний өдрийн 05:00 цагаас 12-р сарын 10-ны өдрийн 05:00 цагийн хооронд иргэд, байгууллагаас Нийт 4329, удаа холбогдсоноос, гэмт хэргийн 162, зөрчлийн 1203, Зам тээврийн ослын 379, мэдээлэл шалгахад, гэмт хэргийн шинжтэй 87-н үйлдэл бүртгэгдсэнийг холбогдох нэгжүүд шалгаж байна.
-
2015 оны 12 сарын 10
Солонгос руу 90 хоногийн хугацаатай зорчих визийн журамд орсон өөрчлөлтүүдийн нэг нь урилгагүй виз мэдүүлдэг болсон явдал юм. Мөн санхүүгийн чадварыг илтгэх бичиг баримтаас чөлөөлдөг хөнгөвчилсөн нөхцөлд хамрагдах иргэдийн хүрээг нэмсэн. Тухайлбал, өндөр насны тэтгэвэрт гарсан хүн эмчилгээний журмаар Солонгос руу гарах даа тэтгэврийнхээ дансанд мөнгө байршуулж, түүнийг нь барьцаалдаг байсныг болиулсан билээ. Түүнчлэн 500 мянган төгрөгөөс дээш цалинтай иргэд нийгмийн даатгалаа сүүлийн зургаан сарын турш тасралтгүй төлсөн бол мөнгө байршуулах шаардлагагүй нийгмийн даатгалын дэвтрээрээ виз авч болох аж. Энэ мэт Солонгос улсын виз авах шалгуур нөхцөл багассантай холбоотойгоор тус улсад “харлах” тохиолдол нэмэгдсэн байна. Энэ талаар тодруулахад, “Манай иргэд Солонгос руу олноор зорчиж байна. Энэ хэмжээгээр тухайн улсад манайхны хэлдгээр “харлах” өөрөөр хэлбэл визийн хугацаа хэтрүүлэх асуудал түгээмэл болсныг тус улсын Элчин сайдын яамнаас мэдээлсэн. Тэгэхээр иргэд бусдыгаа бодоод дор бүртээ ухамсартай хандаж, визийнхээ хугацааг хэтрүүлэхгүй байхыг хүсье. Учир нь, “харлах” тохиолдол ихэсвэл дараа дараагийн иргэд зорчиход хэцүү болж болзошгүй. Хилийн чинадад гарсан болон манай улсад зорчиж ирж буй иргэдийн нарийн тоог Иргэний шилжилт хөдөлгөөний газраас авах боломжтой” гэсэн юм. - See more at: http://www.unen.mn/content/57554.shtml?alias=unen#sthash.HaWGtdIN.dpuf
-
2015 оны 12 сарын 10
Арванхоёрдугаар сарын 10. Энэ өдрийг дэлхийн олон улс орон Хүний эрхийн өдөр болгон жил бүр тэмдэглэдэг. Манай гариг дээр оюун ухаант хүн болж төрсөн хэн боловч эрхээ эдлэх ёстой гэсэн зарчмын үүднээс НҮБ-ын Ерөнхий Ассамблейн саналаар 1950 оны арванхоёрдугаар сарын 10-наас эхлэн тэмдэглэж иржээ.
1948 оны арванхоёрдугаар сарын 10-нд НҮБ-ын Ерөнхий Ассамблей “Хүний эрхийн түгээмэл тунхаглал”-ыг хэлэлцэж баталсан учраас энэ өдрийг ийн сонгосон гэдэг. Энэ тунхаглал дэлхийн бүх улс орон, ялангуяа НҮБ-ын гишүүн орнуудад хамаарч үйлчилнэ.
Хүн төрөлхтөнд хамгийн их гай гамшиг учруулсан Дэлхийн хоёрдугаар дайн дууссаны дараахан баталсан энэ тунхаглалд хүний наад захын эрхийг тунхаглаж өгсөн байдаг. Өөөрөөр хэлбэл дэлхийн бүх улс орны иргэд хэн нь ч гэсэн улс төр, иргэний, нийгэм, соёл, эдийн засгийн хувьд эрхээ эдлэх ёстой гэжээ.
НҮБ энэ өдрийг жил бүр өөр өөрийн уриан дор тэмдэглэн өнгөрүүлдэг уламжлалтай. 2004 онд “Хүний эрхийн салбар дахь боловсрол”, 2005 онд “Тарчлаан зовоохтой тэмцэх нь”, 2008 онд “Хүний эрхийн түгээмэл тунхаглалыг баталсны 60 жилийн ойд”, 2013 онд “Таны эрхийн төлөө 20 жилийн тэмцэл” гэсэн уриатай тэмдэглэж байжээ.
- Дэлхийн хоёрдугаар дайны дараа Хүний эрхийг хамгаалах хөдөлгөөн өрнөж эхлэхэд АНУ-ын Ерөнхийлөгч Франклин Делано Рузвельт хүний үндсэн дөрвөн эрхийг нэрлэсэн байдаг. Энэ бол үг хэлэх, өөрийгөө илэрхийлэх, итгэл үнэмшилтэй байх, хэрэглээний эрх, айдсаас ангид байх эрх гэжээ.
- Хүний эрхийн түгээмэл тунхаглал”-ыг батлахын тулд НҮБ-ын Ерөнхий Ассамблейн хороо 85 удаа хуралдаж, зүйл заалт, үг өгүүлбэр нэг бүрээр 1400 удаа санал хурааж байсан гэдэг. Ингээд 1948 оны арванхоёрдугаар сарын 10-ны өдрийн 183 дахь хуралдаанаар олонхийн саналаар баталсан байна. Санал хураалтад оролцсон 56 орноос 48 нь зөвшөөрсөрч баталсан бол 8 нь түдгэлзсэн санал өгч байжээ.
- “Хүний эрхийн түгээмэл тунхаглал”-ын эхийг канадын иргэн Жон Хампре, АНУ-ын тэргүүн хатагтай Элеоноре Рузвельт нар боловсруулсан гэдэг.
- Манай улсад Хүний эрхийн түгээмэл тунхаглалыг 1989 оны хоёрдугаар сарын 9-нд нам засгийн “Үнэн” сонин анх удаа олон нийтэд зориулан хэвлэсэн ч 20 дугаар зүйлийн 1 дүгээр заалт дахь “Хүн бүр тайван жагсаал цуглаан хуралд оролцох эрхтэй” гэдгийг нь “Энхтайвны жагсаал цуглаанд оролцох эрхтэй” хэмээн засварлан хэвлэж байжээ.
- Энэ жилийн Олон улсын хүний эрхийн өдрийг хүний эрхийн салбар дахь хоёр чухал пакт батлагдсаны 50 жилийн ой угтсан нэг жилийн аяныг эхлүүлж байгаа юм байна. Энэ нь Хүний эдийн засаг, нийгэм, соёлын эрхийн тухай олон улсын пакт, Иргэний улстөрийн эрхийн тухай олон улсын пакт юм. Олон улсын энэ баримт бичгийг НҮБ-ын Ерөнхий Ассамблей 1966 оны арванхоёрдугаар сарын 16-нд баталжээ.
-
2015 оны 12 сарын 10
Төрийн ордонд
09:00 цагт 21 аймгаас ирсэн Удирдах ажилтнуудын зөвлөгөөн болно.
Засгийн газрын 11-р байрны 514 тоот танхимд
11:00 цагт Олон улсын хүний эрхийн өдрийг тохиолдуулан ХЭҮК-оос хэвлэлийн бага хурал зарлалаа. Хүний эрхтэй холбоотой сонирхолтой мэдээллүүд өгөх тул та бүхэн өргөнөөр ирж сурвалжлана уу. Холбоо барих утас 88026226
Хөшөөнд цэцэг өргөнө
11:30 цагт Олон улсын хүний эрхийн өдөр, Ардчилсан хувьсгалын 25 жилийн ойг тохиолдуулан Төр, нийгмийн нэрт зүтгэлтэн Ж.Батмөнхийн хөшөөнд цэцэг өргөж хүндэтгэл үзүүлнэ.
ШӨХТГ-т
10:30-11:00 цагт СӨХ-ийн талаар мөнхийн гомдол, санал хүсэлт ШӨХТГ-т өдөр, цаг, минут тутамд ирж байдаг. Иймд ШӨХТГ-ын зүгээс ”Шилэн СӨХ” буюу айл хоорондын амьд харилцаа үүсгэх facebook группыг СӨХ болгонд нээж өгч, хурлаа хэрхэн зохион байгуулах, гомдлыг хэрхэн гаргах гээд иргэдэд боломж бололцоог гаргаж өгч байна. Энэ талаар мэдээлэл авч, СӨХ-ийн хүмүүстэй уулзаж болно. 91021020
Улаанбаатар зочид буудлын 6-н давхрын ”Өргөө” танхимд
09:00 цагт Олон улсын ”Хүний эрхийн өдөр”-ийг тохиолдуулан АИФО Италийн төрийн бус байгууллагын Монгол дахь Төлөөлөгчийн газар Монголын Аутизмын Холбоотой хамтран уулзалт хэлэлцүүлэг болно. Тус хэлэлцүүлэгт ЭМСЯ, ХАХНХЯ, Сэтгэцийн эрүүл мэндийн үндэсний төв, Хөгжлийн бэрхшээлтэй хүмүүсийг хамт олонд түшиглэн сэргээн засах ”Тэгш дүүрэн” хөтөлбөр, Сэргээн засалт хөгжлийн үндэсний төв зэрэг байгууллагууд оролцоно. Холбоо барих утас №99095302, 89008516
МН мэдээллийн төвд
11:30 цагт ”Театр хүний эрхийн төлөө” төслийн хаалтын ажиллагааны хэвлэлийн хурал болох гэж байна. Хуралд Нээлттэй нийгэм форумын Засаглалын хөтөлбөрийн менежер Б.Хишигсайхан, УДЭТ-ийн уран сайхны удирдагч, Төрийн соёрхолт, Ардын жүжигчин Н.Сувд, Урлагийн гавьяат зүтгэлтэн Ч.Найдандорж, Глоб интернэшнл төвийн тэргүүн Х.Наранжаргал нар оролцоно.
-
2015 оны 12 сарын 10
Сэлэнгэ аймгийн прокурорын газар гэмт хэргээс урьдчилан сэргийлэх ажлын хүрээнд аймгийн цагдаагийн газартай хамтран өнгөрсөн 7 хоногт тус аймгийн Сүхбаатар сумын нутаг дэвсгэрт үйл ажиллагаа явуулж буй шатахуун түгээх станцуудын харуул хамгаалалт, ажилтнуудын ажлын хариуцлага, сахилга, сонор сэрэмжийн байдалд гэнэтийн шалгалт хийсэн байна.
Шалгалтанд орон нутагт шатахуун түгээх үйл ажиллагаа явуулж байгаа ‘’Магнай трейд‘’, ‘’Шунхлай‘’, “Петровис‘’, ‘’Сэлэнгэ петровис‘’ зэрэг нийт 10 шатахуун түгээх станцууд хамрагджээ.
Шалгалтын дүнгээс үзэхэд Дээрхи шатахуун түгээх станцуудад харуул хамгаалалтын хэрэгслийн тоог нэмэгдүүлэх, камержуулалтыг сайжруулах, байнгын ажиллагаатай байлгах, дохиололын системээ галын аюулгүй байдал, бусад гэнэтийн аюул осол гарсан тохиолдолд яаралтай мэдэгдэж мэргэжлийн байгууллагатай холбох ажлыг нэмэгдүүлэх шаардлагатай гэсэн дүгнэлт гаргасан байна.
Иймд ШТС-ийн эрхлэгч нарт гэмт хэргээс урьдчилан сэргийлэх хууль тогтоомжийн хэрэгжилтийг хангуулах, сонор сэрэмжийг дээшлүүлэх талаар цагдаагийн байгууллагаас газар дээр нь мэдэгдэл өгсөн байна.
