Хүүхдийн мөнгө тойрсон улстөржилт үргэлжилж, АН-ынхан гол дүрд нь тоглож байна. Хүүхэд бүрт мөнгө гэж шаардаж байгаа сөрөг хүчний үйлдлийг “Матрын нулимс” унагаж байна гэж дүгнэхэд буруудахгүй юм. Учир нь өөрсдөө засаг барьж, Ч.Сайханбилэгийг Ерөнхий сайд байх үед хүүхдийн мөнгийг танах санаачилга гаргаж байсан нам нь АН. Тэд зайлшгүй шаардлагатай гэсэн хүүхдэд  мөнгө олгож, хавтгайруулж олгодог байдлыг зогсоох нь зөв гээд энэ талаар хуулийн төсөл боловсруулж байсан билээ. Тэр талаараа “Компанийн захирал, УИХ-ын гишүүдийн хүүхэд гэж хамааралгүй хүүхдийн мөнгийг олгодог байдлыг зогсоох ёстой” гэж мэдэгдсэн юм. Харин хоёрхон жилийн өмнө ийм зүйл ярьж байсан АН-ынхан өнөөдөр сөрөг хүчин болчихоод Хүүхдийн мөнгөний хамрах хүрээг 100 хувьд хүргэх ёстой гэж мэдэгдэх нь зөв үү. Уг нь ингэж попрохын оронд илүү хүүхдийн мөнгөнд зарцуул гэж шаардаж байгаа мөнгийг арай илүү, зорилтод бүлэгт нь өгвөл зүгээр биш үү. Энэ талаар ч олон нийтийн сүлжээнд янз бүрийн байр суурь хөвөрч байна. Тухайлбал, “Баячуулын хүүхдэд 20 мянган төгрөг өгөх гэж улайран зүтгэж байхаар МСҮТ-д сурдаг хэдэн оюутандаа тэтгэлэг 50 мянган төгрөг өг гээд зүтгэсэн бол.... Нийт суралцагчдын 70 хувь нь хагас өнчин залуус юм билээ. Тэд мэргэжил эзэмшиж хоолондоо хүрэх гэж зүтгэж байна” гэх байр суурь ч явж байна. Үнэхээр АН-ынхан нийгмийн халамж зайлшгүй шаардлагатай байгаа тэр хэсэг рүү хандсан бодлого явуулъя гэж шаардсан бол олон нийт ч дэмжих нь гарцаагүй билээ.