Нийслэлийн хөрөнгө оруулалтын хэмжээ олон хүний анхаарлыг татаж байна. Учир нь Э.Бат-Үүл нийслэлийн Засаг дарга болсноос хойш хөрөнгө оруулалтын зардал огцом нэмэгджээ. Тухайлбал 2012 онд 166.2 тэрбум, 2013 онд 210.3 тэрбум, 2014 онд 165.7 тэрбум, 2015 онд 260.3 тэрбум төгрөгийг нийслэлийн хөрөнгө оруулалтад зарцуулжээ. Үндсэндээ Э.Бат-Үүл Засаг дарга болсноос хойш хөрөнгө оруулалтад гурван жил хагасын хугацаанд 802.5 тэрбум төгрөг зарцуулсан аж. Үүн дээр "Гудамж" гэх мэт өр зээлээр хийж байгаа олон хөтөлбөрийг нэмэхээр замаа алдана. Тэгэхээр нийслэл хөрөнгө оруулалтад зарцуулж байгаа мөнгө, авсан өр зээлийн хэмжээ шигээ хөгжиж чадаж байгаа юу гэдэг асуудал урган гарч ирнэ. Энэ их мөнгөний зарцуулалт, үр дүнгээ улаанбаатарчууддаа тайлагнадаг уу гэсэн асуулт нэмэгдэнэ. Үүнийг тодорхой болгохын тулд МАН-ын үед нийслэлийн хөрөнгө оруулалт, өр зээл ямар байсан бэ гэдгийг харьцуулан дүгнэх ёстой.

МАН 2000 оноос хойш 11 жил нийслэлийг удирдаад Э.Бат-Үүлд шилжүүлсэн. М.Энхболд нийслэлийг зургаан жил удирдахад хөрөнгө оруулалтад ердөө 12.5 тэрбум төгрөг зарцуулжээ. Тэр ч бүү хэл 2000-2003 он хүртэлх хугацаанд нийслэлд хөрөнгө оруулалтын зардалд нэг ч сохор зоос тавьж байгаагүй аж. Учир нь 1996-2000 онд улс орныг удирдаж тартагт нь тултал эдийн засгийг унагасан. Үр дүнд нь "Төрөө хямралаас гаргая, түмнээ ядуурлаас аваръя" гэсэн уриа цойлон гарсан үе л дээ. Тиймээс хөрөнгө оруулалтын зардал битгий хэл байнга тасардаг цалин, тэтгэврээ хугацаанд нь яаж тавих вэ гэсэн асуудал тавигдаж байсан юм. Ингээд нийслэл дөрвөн жилд хөрөнгө оруулалтын зардалгүй урсгалаараа явжээ.

Ц.Батбаяр хоёр жил нийслэлийг удирдахдаа хөрөнгө оруулалтад 28.1 тэрбумыг зарцуулсан бол Т.Билэгт нэг жилд 12.9 тэрбумыг зарцуулсан байна. Харин Г.Мөнхбаяр гурван жилд 152.4 тэрбумыг хөрөнгө оруулалтын ажилд зориулжээ. Өөрөөр хэлбэл, МАН Улаанбаатарыг удирдсан 11 жилийн хугацаанд нийтдээ 205.9 тэрбум төгрөгөөр нийслэлийн бүтээн байгуулалтыг хийж иржээ. Гэтэл Э.Бат-Үүл гурван жил хагасын хугацаанд 802.5 тэрбум төгрөгийг хөрөнгө оруулалт нэрээр цацжээ.  11 жилд зарцуулсан мөнгөнөөс дөрөв дахин их мөнгийг гурван жилд хөрөнгө оруулалт нэрээр зарцуулсан. Ийм богино хугацаанд ийм их мөнгө зарцуулаад Улаанбаатар маань тасархай хөгжсөн үү? Ард түмэн үүнийг асууна.

АН 2012 онд нийслэлд олон амлалт өгч ялалт байгуулсан. Гэр хорооллыг хаус болгох, Улаанбаатарын захиргааг нүүлгэх, метро барих, гэр хорооллын айл бүрт халуун хүйтэн ус хүргэнэ гэсэн олон амлалтынхаа алиныг ч биелүүлээгүй. "Чингис" бондын мөнгөөр замуудаа нэлээд зассан. Хөрөнгө оруулалтын зардал хаашаа орж, юу болсон бэ? Үүнийг л улаанбаатарчууд Э.Бат-Үүлээс асуух ёстой. МАН-ын үед хөрөнгө оруулалтын зардал асар бага байсан. Гэхдээ одоогийнхоос дутуугүй л ажил хийж ирсэн. Харин дөрөв дахин их мөнгөтэй Э.Бат-Үүл хотод ямар бүтээн байгуулалт шинээр хийж байна вэ? Хариулт хайх иргэдийн тоо нэмэгдэж байна.