Италийн концептуал уран бүтээлч Мариуцио Катталаны дэлхий даяар шуугиан тарьсан “Comedian” нэртэй бүтээлийн гол хэсэг болох хананд мөнгөлөг скочоор наасан бананыг Францын Centre Pompidou-Metz музейгээс хулгайлсан талаар мэдээлжээ.

Музейн мэдээлснээр, тавдугаар сарын 30-ны өдөр хамгаалалтын ажилтан үзмэрийн банана алга болсныг анзаарч, цагдаад мэдэгдэн хэрэг бүртгэл нээсэн байна. Гэвч бүтээлийн зааврын дагуу бананыг хэдхэн цагийн дотор шинээр сольж, үзэсгэлэнг хэвийн үргэлжлүүлжээ.

“Comedian” бүтээл нь анх 2019 онд Майамид болсон урлагийн үзэсгэлэнд танилцуулагдсан бөгөөд энгийн бананыг хананд скочоор наасан байдгаараа онцлогтой. Гэсэн ч уг бүтээлийн бодит үнэ цэнэ нь бананад бус, харин жинхэнэ эсэхийг баталгаажуулсан гэрчилгээ болон бүтээлийг хэрхэн байрлуулах зааварт оршдог гэж урлаг судлаачид үздэг. Бүтээлийн нэг хувилбар 2024 онд дуудлага худалдаагаар 6.2 сая ам.доллараар зарагдаж байв.

Энэ нь тус бүтээлтэй холбоотой анхны дуулиан биш юм. Өмнө нь хэд хэдэн хүн үзэсгэлэн дээр байрлуулсан бананыг идэж байсан бөгөөд 2025 онд ч мөн үзэгч бананыг авч идсэн тохиолдол бүртгэгдэж байжээ. Тухай бүрд музей шинэ бананаар сольж байсан байна.

Уран бүтээлч Мариуцио Катталаны энэхүү бүтээл нь орчин үеийн урлагийн үнэ цэнэ, зах зээлийн хөөрөгдөл, хүмүүсийн урлагийг ойлгох ойлголтыг шүүмжилсэн концептуал бүтээл гэж тооцогддог. Харин энэ удаагийн хулгай дахин нэг удаа дэлхийн хэвлэл мэдээллийн анхаарлыг татаж, урлагийн үнэ цэнэ яг юунд оршдог вэ гэсэн маргааныг сэргээж байна.

Л.Баяр