МАХН-ын дарга Н.Энхбаярын шүүх хурал хоёр удаа хойшлогдож ирэх долоо хоногийн мягмар гарагт болохоор товлогдоод байгаа. Энэ хооронд Н.Энхбаярыг сонгуулиас урьтаж хэргээ задлахаар бэлдэж байгаа тухай яриа гарч эхлэв. Сонгуулиас өмнө нь түүнд ял өгөөхөр зүтгэж байгаа гэж намынхан нь үзэж байгаа. СЕХ өчигдөр түүнийг нэр дэвшигчээр бүртэхгүй гэсэн нь тэдний хор шарыг улам малтаж орхижээ. Тиймээс Н.Энхбаяр өөрийгөө аврахын хажуугаар эрх баригчдаас хариугаа авахын тулд хэргээ задлахаар намын хуульч, зөвлөгч нартайгаа бэлдэж байгаа сураг ажиг байна. Түүнийг хэргээ задалбал араасаа маш олон хүнийг хөлдөө чирнэ гэдэг тодорхой болоод байгаа билээ. УИХ-ын гишүүн Х.Тэмүүжин “Н.Энхбаяр маш том аалзны торны сүлжээг задлах гэрч болж байгаа. Тиймээс хорлогдох вий гэж айж байна” гэсэн гарчигтай ярилцага өгч байв. Үнэхээр Н.Энхбаярт энэ олон жилийн турш хуримтлагдсан маш олон авлигын, ашиг сонирхлын зөрчилтэй хэргийн баримтууд бий аж. Ерөнхийлөгч асан үнэхээр авлига авсан, хууль бусаар өмч хөрөнгө авсан юм бол тэр үүнийг ганцаараа хийгээгүй, олон хүний гараар дамжсан гэдэг нь тодорхой байгаа билээ. Ерөнхий прокурор Д.Дорлигжавын тухайд гэхэд 800 сая долларын асуудал сөхөгдөх бол түүний хэрэгт холбоотойгоор АТГ-т шалгуулахаар болсон УИХ-ын гишүүн Х.Наранхүү, Ц.Батбаяр нарын хэрэгт ч хурдан шуурхай нэг тийш шийдэгдэх нөхцөл үүсэх аж.
Өмнө нь Н.Энхбаяр АТГ-ын ажилтнуудад дуулиан шуугиантайгаар хөлөө гозолзуулан баривчлагдахынхөө өмнөх өдөр 2008 оны 7-р сарын нэгэнтэй холбоотой ҮАЗ-ын 200 гаруй хуудас протоколыг дэлгэн тавьсан билээ. Тэгээд л маргааш нь Төв аймаг руу ачигдсан. Протокол бол ердөө л Н.Энхбаярт байгаа “хар данс”-ны хавтас аж. Түүнд агентлагийн дарга, аймгийн засаг дарган нараас эхлээд төрийн өндөр албан тушаалтнуудыг суудлаас нь буулгах хангалттай нотолгоо байдаг тухай ойрын хүмүүс нь ярдаг юм.
УИХ-д нэр дэвших эрхийг нь хаагаад, хорих ял өгөх дээрээ тулбал Н.Энхбаяр бас амиа бодох хэрэгтэй, эрхтэй. 2008 оны долдугаар сарын нэгний хэрэгт холбогдсон цагдаагийн хурандаа нарт ажлын хариуцлага алдсан гэж 2,6-3,6 жилийн оноолоо. Тэгвэл үүнээс илүү хурдацтай өрнөж буй Н.Энхбаярын шүүх хурал ирэх долоо хоногт ч шийдвэрээ гаргачихаж магадгүй. Сонгууль хаяанд ирээд, амьсгаа нь тулаад байгаа энэ үед МАХН-ын даргыг “аав”-ын оруулчих санаатай хүмүүс эрх баригчдын дунд олон байгаа нь нэгэнт ил болсон билээ. Н.Энхбаяр буруутай ч бай, буруугүй ч бай түүний хэрэг УИХ-ын сонгуулиас л өмнө шийдэгдэх нь лавтай.
