Эдийн засгийн байнгын хорооны хуралдаан өнөө өглөө 09:00 цагт Төрийн ордны "B" танхимд эхэлсэн.

Энэ үеэр хоёр асуудал авч хэлэлцсэний нэг нь “Төрөөс иргэний нисэхийн салбарт 2020 он хүртэл баримтлах бодлогын хэрэгжилт, Хөшигийн хөндийн шинэ нисэх буудлын ажлын явц, байдал, тулгамдсан асуудлууд”  сэдвээр Зам тээврийн хөгжлийн сайдын мэдээллийг сонссон. Үүнтэй холбогдуулан гишүүд ЗТХ-ийн сайд Д.Ганбатаас хэдэн зүйл тодруулав.

УИХ-ын гишүүн Н.Чинзориг " Бодлогын бичиг баримтын хэрэгжилт ямар байна вэ? Монголын талын шинэ нисэх буудал ашиглалтад орвол Монголын талын 49 хувийн санхүүжилт шийдэгдсэн үү? Та ЗТХ-ийн сайдаар томилогдсоноос хойш иргэний нисэхийн байгууллагуудад томилгоо хийв үү? ИНЕГ-ын дарга таны удирдлагад орохгүй, дээгүүр толгойлж байна гэсэн яриа байсан. Энэ талаар тайлбарлахгүй юу?"  гэсэн түүний асуулгад салбарын сайд Д.Ганбат

" Бодлогын баримт бичиг батлагдаад 3 жил болж байна. Агаарын болон төмөр замын тээврийн бодлогын баримт бичигт өөрчлөлт оруулах шаардлага байгаа. Иргэний агаарын тээврийн бодлогын баримт бичигт ойрын үед өөрчлөлт оруулна.

Ингэхгүй бол 2020 онд гүйцэтгэл гаргахдаа баахан биелэгдээгүй  асуудалтай тулгарна. Иргэний агаарын хуульд нэмэлт өөрчлөлт оруулахаар хуулийн төслөө боловсруулаад явж байна.

  Шинэ нисэх буудлын концессийн 49 хувийг хэрэгжүүлэхийн тулд манай тал 17.1 сая ам.долларыг гаргах ёстой. Санхүүжилтийн асуудал нь шийдэгдээгүй байна. Бид Японы талтай хэлэлцээр хийж, зээл авах асуудал байгаа. Тиймээс төсөвт тусгагдаагүй байна. Зам, тээврийн салбарт бүтэц хийсэн.

Иргэний нисэхийн салбарт мэргэжлийн боловсон хүчнээр хангах бодлогыг барьж ажиллаж байгаа. Удирдах, удирдуулах ёс манай салбарт хэвийн үргэлжилж байгаа гэж би бодож байна. Танд ИНЕГ-ын дарга миний толгой дээр алхаж байна гэж яриагүй.  Бондын хөрөнгөөр авсан онгоцны эргэн төлөлтийн санхүүжилт хүндрэлтэй байгаа. Мэдэгдлүүд ирснийг Засгийн газартаа уламжилсан" гэлээ.

Төрөөс иргэний нисэхийн салбарт 2020 он хүртэл баримтлах бодлогыг УИХ 2013 онд баталсан. Энэ хүрээнд  Иргэний нисэхийн тухай хуулийг шинэчлэн баталжээ.  Иргэний нисэхийн салбарын бүтцийн өөрчлөлтийг Засгийн газрын шийдвэрийн дагуу хийсэн байна.

Олон улсын нисэх буудал, агаарын новигаци зэргийг хувьчилж үл болох төрийн өмчид оруулахаар бэлтгэл ажлыг хангаж байгаа аж. Орон нутгийн нисэх буудлуудын үйлчилгээг албан татвараас чөлөөлөхөөр холбогдох хуульд нэмэлт өөрчлөлт оруулахаар хуулийн төсөл боловсруулжээ.  Мөн  Төв аймгийн Сэргэлэн сумын Хөшгийн хөндийд олон улсын нисэх онгоцны буудал барьж баригдаж буй. Шинэ нисэх буудлыг төлөвлөгөөний дагуу ашиглалтад оруулахаар ажиллаж байгаа гэнэ.

Засгийн газрын хөнгөлөлттэй зээлээр хэрэгжиж байгаа барилгын ажлын явц 99 хувьтай байгаа гэнэ. 2017 оны нэгдүгээр сар манай талд хүлээлгэн өгөх юм байна.   Шинэ нисэх буудлын менежмент төслийг эхлүүлэхэд шаардлагатай хөрөнгө оруулалтыг 34.9 сая ам.доллар байхаар Японы тал тусгажээ.

Үүнээс Монголын талын 49 хувь буюу 17.1 сая ам.долларын  санхүүжилт гарах гарцыг хийжээ. Тиймээс шинэ нисэх буудлын барилгын ажил  хоёр сарын дараа ашиглалтад орох үед  менежментийг хэрэгжүүлэх компанийг байгуулах, Монголын талын 49 хувьд ногдох хөрөнгийн эх үүсвэрийг шийдэх шаардлагатай ажээ.