“Mongolian Pajero Club”-ээс санаачлан зохион байгуулсан бартаат замын уралдааны төрлийн "Scorpion 4x4" тэмцээн дөрөвдүгээр сарын 08-ны өдөр Налайх дүүрэг дэх элсэн карьерын талбайд болсон. Энэхүү уралдааны үеэр “Nissan Tiida” автомашин жолоодсон согтуу жолооч авто осол гаргаж, 3 орчим насны хүүхэд тэвэрсэн эхийг дайрч, хүнд гэмтэл учруулсан хэрэг гарчээ.

Осол гарах үеэр ХСИС-ийн Цагдаагийн сургуулийн 333 дугаар дамжааны сонсогч тэрхүү машиныг холдуулан эх, хүүхдийг аварч, яаралтай тусламж үзүүлж эмнэлэгт хүргэсний улмаар амь насыг нь аварсан байна. Тухайн үед тэмцээн үзээд явж байсан иргэд авто осол гарах үеэр эх, хүүхдийг аврах нь битгий хэл зүгээр л хараад зогсож байсан хэмээн сонсогч Б.Ганбаяр ярьж байв.