Ховд аймгийн нутгаас олдсон 1100 жилийн настай монгол бүсгүйн муми дэлхий нийтийг гайхшируулж байна. Түрэг эмэгтэйн шарилын талаар шинэ мэдээлэл, гэрэл зургууд “The Siberian Times” сонинд гарчээ. Маш загварлаг хувцастай түрэг эмэгтэйн энэхүү олдворыг одоогоос яг жилийн өмнө олон нийтийн хүртээл болж байсан юм.

Сэргээн засварлалтыг хийж байгаа нэг судлаач тус сонинд “Гутал нь улаан, хар өнгийн судалтай маш загварлагаас гадна оёдол сайтай. Ийм гутлыг би одоо ч худалдаж авахад бэлэн байна” гэж хэлсэн талаар мэдээлэлд дурджээ. Түрэг эмэгтэйн гоёл зөвхөн гоёмсог гутлаар ч тогтохгүй. Авсанд нь маш загварлаг цүнх,  гоо сайхны хэрэгсэл байжээ. Тодруулбал толь, сам, жижиг хутга гарч ирсэн байна.  Мөн оёдлын багаж хэрэгсэл,  морь, хонины толгойтой хамт оршуулсан байжээ. Маш сайн хадгалагдсан учраас заримыг нь одоо ч хэрэглэж болохоор аж.