Цалинтай ээж” хөтөлбөрийг 2018 оны эхнээс хэрэгжүүлэхээр болж, 0-3 хүртэлх насны хүүхдээ асарч буй ээжүүдэд сар бүр 50 мянган төгрөгийн тэтгэмж олгохоор төсөвлөсөн. Тэгвэл “Цалинтай ээж” хөтөлбөрт хамрагдах гэж байгаа  ээжүүдийн дундах эргэлзээтэй  хэд хэдэн асуултанд Сонгинохайрхан дүүргийн 14-р хорооны Хөдөлмөр халамж үйлчилгээний мэргэжилтэн Отгонтуяагаас  тодруулсанаа хүргэж байна.

-Цалинтай ээж” хөтөлбөрт  өнөөдрийн байдлаар хэдэн хүн ирж бүртгүүлсэн  вэ?  

-Өчигдрөөс ажил эхэлсэн учраас өглөөнөөс хойш ганц нэг ээж “Цалинтай ээж” хөтөлбөрт хамрагдах материалаа бүрдүүлсэн. Одоогийн байдлаар хэд хэдэн ээж материалаа бүрдүүлж өгсөн байна. Ер нь бол энэ талаар их асууж ирж байна.

-Хөтөлбөрт хамрагдахад ямар материал бүрдүүлэх  вэ?

- Ээжүүдийн хувьд өөрийн хоёр хувь цээж зураг, хүүхдийн төрсний гэрчилгээний хуулбар, гараар бичсэн өргөдөл, өрхийн эмнэлгийн эрүүл саруул өсч бойжиж байгаа гэсэн бичгийг бүрдүүлж өгөх шаардлагатай. Хэрвээ ажил эрхэлж байгаад жирэмсний амралтаа авсан байгаа бол албан байгууллагаасаа энэ тухай тушаалын хуулбар нэмж хавсаргаж өгнө.

-Сайн дураараа нийгмийн даатгал төлдөг бол энэ хөтөлбөрт хамрагдах уу?

-Ажил эрхэлдэг байгууллагаас нь нийгмийн даатгал төлдөг бол хамрагдахгүй. Харин сайн дураараа төлдөг бол хамрагдана.

-Одоо жирэмсэн байгаа ээжүүд хэрхэн хамрагдах вэ?

- Жирэмсэн ээжүүд маань төрсөний дараа бүрдүүлэх материалаа бэлдээд хороон дээрээ бүртгүүлээд мөнгөө авна. Хүүхдээ асарч буй ээжүүдэд олгох 50 мянган төгрөгийг нөхөж олгохгүй. Тиймээс цаг тухайд нь бүртгүүлээрэй.

- Бүрдүүлэх бичиг баримт дээр иргэний үнэмлэхний хуулбар гэж заасан. Хэрэв иргэний үнэмлэхээ хаяж гээсэн тохиолдолд ТҮЦ машины лавлагаагаар бүртгүүлж болох уу?

-Болно.

-Оюутан, жилийн чөлөө авсан ээжүүд хэрхэн хамрагдах вэ?

-Сургуулийн чөлөөний хуудсаа бусад бүрдүүлэх материалтайгаа авчирч өгнө.

-Хүүхэд нь цэцэрлэгт явдаг бол хөтөлбөрт хамрагдах уу?

- Хамрагдана.