Утаа, угаар хоёрт дарлуулсаар чамгүй олон жилийг үдсэн улаанбаатарчууд хорт утааг цээжээ дүүртэл амьсгалсаар уушгигүй болж байгаа нь үнэн. Энэ асуудлыг ярьж, өвчлөл ихэсч байна хэмээн төрийн дээдсүүдийн чихэнд хүргэх гэж жагсч цуглаж байгаа ч төдийлөн үр дүнд хүрэхгүй явна. 
УИХ-ын эрхэм түшээд зуухтай танилцаж, утаа, угаартай нүд, хамраараа уулзана гээд л яваа. Эцэст нь, өмнөх жилүүдэд тарааж байсан зуух хулхиных байсан хэмээгээд энэ жил яг жинхэнэ утаа гаргадаггүй зуух тараана гэсэн зүйл дуулгаж байгаа. Үүнийгээ ч хэрэгжүүлэхээр ханцуй шамлан ажилдаа орцгоосон. Тиймээс ирэх жилээс эхлэн утаа багасах төлөвтэй. Харин хохирсон иргэдийн эрүүл мэндийн асуудлыг хэрхэн шийдэх нь тодорхойгүй. Үүнд зарим гишүүн санаа тавьж эхэлсэн байна. Тодруулбал, УИХ-ын гишүүн О.Баасанхүү "Эрүүл уушги" хөтөлбөрийг хэрэгжүүлэх ёстой гэдгийг чуулганы танхим суугаа ангийн андууддаа дуулгалаа. Магадгүй эрүүл уушгигүй болсон иргэд хөтөлбөр хэрэгжсэнээр  шинэхэн уушгитай болох бололтой. 
Ерөнхийдөө төрийн түшээд хорт угаар дунд амьдарч байгаа иргэдээ одоо харж байгаа нь энэ.