Монгол Улсын төрийн тэргүүний идэр залуу насны түүх, бизнесийн гараа нь ХБНГУ-аас эхтэй гэдэг. Тэрээр ардчилал зах зээлийн замд шилжих тэр үед Барууны орныг зорьж ажиллаж амьдарч байснаа хожим дурсан ярьсан байдаг.

Ерөнхийлөгч Х.Баттулга, найз Э.Ванчинсүрэнгийн хамтаар ХБНГУ-ын Магдебург хотод байх үед нь неонацистууд халдсан аж. Энэ үеэр Петер болон Бригитте Гриель нар хоёр залууг халдлагаас хамгаалж, тэдний амийг аварч байсан юм байна. Тэгвэл Гриелийн гэр бүл одоо ч ХБНГУ-ын Магдебург хотод оршин суугаа бөгөөд тэдэнд Монгол Улсын Ерөнхийлөгч Х.Баттулга талархлын мэндчилгээ илгээснийг тус улсад суугаа Онц бөгөөд Бүрэн эрхт элчин сайд Д.Ганбат гардуулан өгчээ.

Гэрийн эзэгтэй 28 жилийн өмнө болсон үйл явдлыг Х.Баттулга одоо болтол дурсаж явдагт талархал илэрхийлсэн бөгөөд гэрийнхээ үүдэнд Монгол Улсын далбааг байршуулсан байна. Монгол Улсаас ХБНГУ-д суугаа Онц бөгөөд Бүрэн эрхт элчин  сайд Д.Ганбат  гэр бүлээрээ энэ зун Монголд хүрэлцэн ирэхийг урьсан Ерөнхийлөгч Х.Баттулгын урилгыг дамжуулсан байна.