Татвар тэтгэврийн насыг нэмэх Засгийн газрын шийдвэрийг иргэд эсэргүүцэж, МҮЭХ-ноос жагсаал цуглаан ч зохион байгуулаад амжсан билээ. Олон нийтийн эсэргүүцэлтэй тулсан У.Хүрэлсүхийн Засгийн газар шийдвэрээ эргэн харахад хүрч, 100 дахь хоногтойгоо золгосон өдрөө ээлжит бусаар хуралдан шийдвэрээ өөрчилсөн. Тэгвэл дээрх асуудлыг хөндөж байсан Монголын үйлдвэрчний эвлэлийн холбооноос хэвлэлийн хурал зарлан мэдээлэл хийсэн юм.  Холбооны ерөнхийлөгч Х.Амгаланбаатар “Монгол Улсын Засгийн газар Олон Улсын Валютын сантай хамтран “Өргөтсөн санхүүжилтийн хөтөлбөр”-ийг хэрэгжүүлэхээр долоон төрлийн татвар, нийгмийн даатгалын шимтгэл, өндөр насны тэтгэвэр тогтоолгох насыг нэмэгдүүлж, цалин хөлсийг 2019 он  хүртэл царцаах, төрийн албанд нөхөн томилгоо хийхгүй байх шийдвэрүүдийг гаргасан. Харин МҮЭ-ээс эдгээрийг эсэргүүцэж, холбогдох яам, Засгийн газар, УИХ-д хүргүүлж жагсаал цуглаан зохион байгуулсны үр дүн гарлаа. Засгийн газар шийдвэрээ цуцалж, бүх зүйлийг эргүүлэн байранд нь тавьсан. Мөн төрийн албан хаагчдын цалин хөлсийг нэмэгдүүлэх асуудлыг тавьсан нь үр дүнд хүрч, гуравдугаар сард хэлэлцээрийн ширээний ард суухаар болсон" гэж хэллээ. 

Хөдөлмөр, нийгмийн зөвшилцлийн гурван талт 2017-2018 оны улсын хэлэлцээрийн хүрээнд дараахь асуудлуудыг шийдвэрлэх боломжтой болсон байна.

Тухайлбал, Хүнд, хортой, халуун нөхцөлд ажиллаж байгаа эмэгтэй 50, эрэгтэй 55 настай тэтгэвэрт гарах, хэвийн нөхцөлд ажиллаж байгаа ажилтан өөрөө хүсвэл 55, эрэгтэй 60 настай тэтгэвэрт гарч болох өмнөх хуулийн хэрэгжилт хэвээр мөрдөгдөх нөхцөл бүрджээ. Хувь хүний орлогын албан татварыг нэмэгдүүлэхгүй, төрийн албан хаагчдын цалинг 2018 онд нэмэгдүүлэх,  АИ-92, А-80 төрлийн бензиний үнийг тогтвортой байлгах, төсвийн байгууллагуудын төсвийн хэмнэлт, өөрийн үйл ажиллагаанаас орох орлогоор ажиллагчдын цалин хөлсийг нэмэгдүүлэх боломж болон нийгмийн хамгааллын бусад асуудлууд шийдвэрлэгдэх боломжтой болоод байгаа ажээ.

Тус байгууллагын тэмцэл үүгээр дуусахгүй бөгөөд цаашид шаардлагатай гэж үзсэн асуудлууд дээр өөрсдийн байр суурийг тодорхой илэрхийлэхээ мэдэгдлээ.