Халаа сэлгээ, холио солионы асуудал яамдууд дээр явагдсаар байна. Аль ч засаглалын үед байдаг уг асуудал ёс мэт болсон зүйл. У.Хүрэлсүхийн Засгийн газрын сайд нар өөрийн хариуцсан салбарт ийм арга хэмжээ авч байгаа билээ. Одоогийн байдлаар Засгийн газар салбар хариуцсан дөрвөн яамны Төрийн нарийн бичгийн даргыг ажлаас нь чөлөөлсөн. Тиймээс ор гарсан төрийн нарийны суудлын төлөөх сунгаа ч эхэлчихсэн яваа.

Боловсрол соёл, шинжлэх ухаан спортын яамны Төрийн нарийн бичгийн даргаас Ж.Болормааг, Сангийн яамны Төрийн нарийн бичгийн даргаас Б.Нямааг, Хөдөө аж ахуй, хөнгөн үйлдвэрийн яамны Төрийн нарийн бичгийн даргаас Л.Баяртулгыг, Эрүүл мэндийн яамнаас Д. Очирбат нар үүрэгт ажлаасаа чөлөөлөгдчихсөн. Энэ хүмүүсийн суудал эзгүйрч, ор гарсан тул оронд нь залрах эрхмүүдийг тодруулах марафон явж байгаа юм. Сангийн яамны Төрийн нарийн бичгийн даргаар С.Наранцогтыг, Боловсрол соёл, шинжлэх ухаан спортын яамны Төрийн нарийн бичгийн даргаар МУИС-ийн улс төр судлалын тэнхмийн эрхлэгч С.Мөнхбат нар очихоор яригдаж эхэлсэн байна. Мөн ХАААҮЯ-ны Төрийн нарийн бичгийн даргаар Баянзүрх дүүргийн мэргэжлийн хяналтын газрын Эрүүл ахуй, халдвар хамгааллын хяналтын улсын байцаагч Д.Энхбат томилогдох бололтой. Харин Байгаль орчин, аялал жуулчлалын дэд сайд Ц.Батбаярыг тус яамны Төрийн нарийн бичгийн даргаар томилох бор шувууны жиргээ сонсдов. Учир нь, тус яамны Төрийн нарийн бичгийн даргаар 2016 оны наймдугаар сараас хойш ажилласан Ц.Цэнгэл тэтгэвэртээ гарахаар зэхэж байгаа тул үүрэгт ажлаас нь чөлөөлж, дэд сайд Ц.Батбаярыг томилохоор яригдсан байна.

Ийнхүү төрийн нарийнуудын томилгоо тун удахгүй явагдах шинжтэй. Мэдээж хэрэг уг албан тушаалын суудал эзгүйрсэн тохиолдолд яам үйл ажиллагаа явуулахад бэрхшээлтэй болно. Тиймээс салбар хариуцсан сайд нар болон Засгийн газрын зүгээс асуудлыг яаравчлан шийдэх биз ээ.