Ираны Табриз хотод болж буй 29 дэх удаагийн “Тахтийн цом” Олон улсын “А” зэрэглэлийн тэмцээнд барилдаж буй Монголын Үндсэний шигшээ багийн бөхчүүд эхний өдрийн урьдчилсан болон хагас шигшээ барилдаанд тун амжилттай барилдаж байгаа тухай сайхан мэдээ ирлээ.Табризийн дэвжээнд түрүүлэн гарсан манай дөрвөн бөх үнэхээр өнгөтэй, гялалзсан амжилттай тэмцээнээ үргэлжлүүлж байгаа аж. Тухайлбал 57 кг-д барилдаж байгаа Монгол Улсын гавьяат тамирчин Э.Бэхбаяр, 65 кг-д барилдаж байгаа ОУХМ Т.Тулга нар финалд шалгарч, аваргын алтан медалийн төлөө барилдах эрхтэй болоод байгаа юм.  

Хамгийн гол нь манай хоёр бөх дэлхийн хэмжээний хүчтэнүүдийг илт илүүрхэн ялсаар финалд гарч иржээ. Э.Бэхбаяр гавьяатын хувьд Армений Михран Жабурян, Ираны Хамид Халилигиг илүүрхэн буулгаж авсан бол ОУХМ Т.Тулга бүр ч илүү урамтай сайхан барилдаж Украины Василий Шуптар, Болгарын Филипп Новачков, Гүржийн Шота Партенадзег тус тус ялснаар маргааш эзэн орны бөхчүүдтэй аваргын алтан медалийн төлөө барилдахаар шилгарчээ. Мөн Монголын бөхчүүд төдийлөн амжилт гаргаж чаддаггүй 92 кг-д барилдсан ОУХМ Ө.Батзул эхний тойрогт Гүржийн бөх Луза Церцвадзе, хоёрдугаар тойрогт эзэн орны бөх Амир Арсалан Татариг ялаад харамсалтай нь хагас шигшээд эзэн орны Араш Мохабид ялагдсанаар хүрэл медалийн төлөө барилдах эрхтэй болжээ. Тэгвэл хамгийн хүнд жин болох 125 кг-д барилдсан спортын мастер М.Лхагвагэрэл эхний тойрогт Туркийн Октай Гунгорыг оноогоор цэвэр ялж, шавгийн наймд эзэн орны Жафар Натерид ялагджээ. Харин түүнийг ялсан Ираны бөх шигшээ шалгарсан тул манай бөх дагаж барилдах эрхтэй болсон байна. Аваргын алтан медалийн төлөөх болон дагах барилдаанууд маргааш Улаанбаатарын цагаар 16:00 цагт эхлэх тул бөх сонирхогчид та бүхэн цэнхэр дэлгэцийнхээ өмнө тухлан сууж бөхчүүдийнхээ урамтай сайхан барилдаануудыг хүлээн авч үзээрэй.  

Д.Түвшин