Тайванийн Хуалиен хотын хойд хэсэгт 2018 оны хоёрдугаар сарын 6-ны өдөр 6.4 магнитудын хүчтэй газар хөдлөлт болсонтой холбогдуулан Тайпэй дахь Худалдаа, эдийн засгийн төлөөлөгчийн газарт ажлын хэсэг байгуулан 24 цагаар ажиллуулж, шуурхай дуудлагын дугаарыг олон нийтэд зарлаж, иргэдийнхээ аюулгүй байдлыг ханганажиллав.

Хуалиен хотын Цу Чи их сургуулийн дөрвөн  оюутныг хоёрдугаар сарын 8-нд,  Дунхва их сургуулийн арван оюутныг хоёрдугаар сарын 9-нд Тайпэйд нүүлгэн шилжүүлж байрлуулаад байна.  Мөн Цу Чи их сургуулийн хоёр оуютан сургуулийн захиргаандаа хүсэлт гаргаж, гарын үсэг зурж энэ хоёрдугаар сарын 7-ны өдөр Тайпэйд ирээд байна. Дунхва их сургуулийн гурван оюутан өөрсдийн хүсэлтээр их сургуулийн байрандаа үлдсэн бөгөөд тэдэнтэй байнгын холбоотой байж мэдээлэл авч байна. Дээрх оюутнуудын Тайпэйд байх хугацаанд гаргах зардлыг Гадаад харилцааны сайдын шийдвэрээр Хилийн чанадад байгаа Монгол Улсын иргэдэд туслах сангаас гаргав.

Тайпэйд нүүлгэн шилжүүлсэн нийт оюутнуудтай ГХЯ-ны Консулын газраас өнөөдөр буюу хоёрдугаар сарын 9-нд видео уулзалт хийлээ. Оюутнуудын эрүүл мэнд, сэтгэл санааны байдлыг хэвийн байна. Оюутнууд  тодорхойгүй хугацаагаар Тайпэйд байх юм.

КОНСУЛЫН ГАЗАР

2018 оны 2 дугаар сар 9