“Пёнчан-2018” өвлийн ХХIII олимпийг тойрсон хамгийн том сенсацийг Германы эрэгтэй хоккейн шигшээ баг тарьж хоккейн эх орон Канадын шигшээ багийг гурав дахь удаагаа, тэгэхдээ олимпийн тоглолтод анх удаа буулган авч жинхэнэ шуугиан тарьлаа. Хагас шигшээгийн эхний тоглолт ОХУ-Чехийн багуудын хооронд болж хойд хөршийн эрчүүд өөрийн хамгийн эвгүй өрсөлдөгчийн нэг Чехийн багийг 3:0-оор бут ниргэж “Пёнчан-2018”-ын тааруухан эхлэлдээ цэг тавьсан билээ. Тэгвэл хоёр дахь хагас шигшээ тоглолтод хөгшин Европын Германчууд хоккейн эх орон Канадын шигшээ багийг 4:3-аар буулган авч Пёнчаны хоккейн ордон байтугай дэлхий даяар жинхэнэ шуугиан тарив. Ийнхүү ХБНГУ-ын эрэгтэй хоккейн шигшээ баг түүхэндээ анх удаа өвлийн олимпийн аваргын төлөө тоглохоор шалгарч үлдээд байгаа юм. Герман-Канадын шигшээ багуудын тоглолтын эхний үеэс л Германчууд тэргүүллийг авсан бөгөөд Мацек хүний илүүгээ ашиглан эхний гоолыг оруулсан. Улмаар хоёр дугаар үед Плахт, Мауэр, Хагер нарын шайб хаалганд орсноор 4:1-ээр хошуучилсан. Сүүлийн үед Канад нөхөж хоёр шайб хийсэн ч цаг хүрсэнгүй. Ингэснээр финалд ОХУ-Канад биш, ОХУ Германы баг учраа таарч байгаа нь жинхэнэ дуулиан болж байна. “Пёнчан-2018” өвлийн олимпийн хамгийн сонирхолтой төрөл болох эрэгтэйчүүдийн хоккейн аваргын төлөө шалгарч үлдээд байгаа ОХУ-ХБНГУ-ын шигшээ багуудын тоглолтын өмнө “Матч-ТВ”-ын тайлбарлагч Алексей Пешнин ямархуу дүн шинжилгээ хийсэнтэй танилцая.

Тэрээр дүгнэхдээ “Юуны өмнө шувтаргын тоглолт тун хурц дайчин болно гэдгийг хэлье. Учир нь сүүлийн жилүүдэд Германчууд хэнээс ч айдаггүй үнэхээр чадварлаг, байрлал бүрт жигд сайн тоглогчтой баг бүрдүүлж чадсан. Энэ тэмцээн дээр гэхэд л тэд эхлээд Шведийн эсрэг дараа нь Канадын эсрэг хэрхэн тоглож байгааг харахад л тэд үнэхээр ямар ч багийн эсрэг тун дайчин, ялах чин эрмэлзлэлтэй тоглож чаддаг нь харагдсан. Тэд энэ удаа тоглолтын эхнээс хэрхэн санаачлагыг авч Швед, Канадуудыг сандаргаж байсан шигээ л тоглох нь тодорхой. Хамгийн гол нь Германы шигшээ баг хурд маш сайтай, тоглогчид нь аль ч багийнхнаас дутахгүй техниктэй гэдгийг мартаж болохгүй. Учир нь тэд их багаасаа бэлтгэгдсэн харьцангуй залуу тоглогчидтой тул хурдны хувьд ихээхэн давуу байдалтай байна. Миний бодлоор манай шигшээгийн залуучууд Чехийн эсрэг тоглосон тэр л арга барил, тэр хурд, хүчний тоглолтоо үзүүлвэл ялалтын харьцаа 60:40 хувиар ОХУ-ын талд ирнэ гэж бодож байна. Гэхдээ маш чадварлаг, ухаалаг, хурдтай залуу тоглогчдоор багаар бүрдүүлсэн Германы шигшээ баг ОХУ-ын шигшээгийн эсрэг ямар арга барил, тактикаар тоглохоор бэлдэж байгааг одоо таамаглахад хэцүү, боломжгүй шахуу байна. Ямар ч гэсэн 1998 оноос хойш ОХУ-ын шигшээ багт ийм сайхан боломж гаралгүй өнөөдрийг хүрсэн гэдгийг манай залуус дор бүрнээ бодож, гайхалтай тоглолт үзүүлэх байх гэж найдаж байна.

Гэхдээ л манай эсрэг тооцоотой, ухаалаг, хурд хүч сайтай залуусаар эгнээгээ бэхжүүлсэн Германчууд зогсож байгаа гэдгийг хаа хаанаа мартаж болохгүй гэдгийг л эцэст нь хэлэхийг хүсч байна” гэжээ. Ингэхээр Олон улсын олимпийн хорооны хатуу ширүүн эсэргүүцэл, зэмлэлийн дор өөрийн улсын тугийг ч барих эрхгүй "Пёнчан-2018"-д алдар нэрээ мандуулах сүүлчийн боломж ОХУ-ын эрэгтэй хоккейн шигшээ багийн залууст ирж байна. Өмнө нь эмэгтэй уран гулгалтын ганцаарчилсан төрөлд Алина Загитова алт, Евгени Медведева мөнгөн медаль авч ОХУ-ын баг тамирчдын урам зоригийг сэргээж эх орон нэгтнүүдээ баярлуулаад байсан билээ. Харин одоо 1998 оноос хойш аваргын төлөө байтугай медалийн төлөө цөөн тоглосон хокейн шигшээ баг ОХУ-ын нэр төрийг өргөх үү, Германчууд анх удаа олимпийн аварга хэмээх эрхэм алдарыг өргөх нь үү гэдгийг харах л үлдэж байна. 

Д.Түвшин