Монголын Үндэсний бөхийн холбооны 8-р “Их Эе” хурал Монгол бөхийн өргөөнд болж өндөрлөлөө. Өглөөнөөс шөнийн хоёр цаг хүртэл үргэлжилсэн уг хурлаар Монголын үндэсний бөхийн холбооны тэргүүнийг тодруулсан юм. Шөнө дөл хүртэл хуралдсаны эцэст 98 хувийн саналаар УИХ-ын гишүүн Б.Бат-Эрдэнэ  сонгогджээ.

Энэ удаагийн хуралд нийт 200 төлөөлөгч оролцохоос 153 төлөөлөгч оролцсон юм. Энэхүү хурлын үеэр Үндэсний бөхийн холбооны тэргүүн Р.Нямдорж Үндэсний бөхийн холбооны тэргүүний сонгуульд нэр дэвшихгүй гэдгээ мэдэгдсэн бөгөөд Тэргүүнийг сонгох сонгуульд дархан аварга, УИХ-ын гишүүн Б.Бат-Эрдэнэ, дархан аварга Г.Өсөхбаяр, улсын аварга Г.Эрхэмбаяр, улсын заан Ц.Магалжав нарын нэрийг хурлын төлөөлөгчид дэвшүүлсэн юм . Ийнхүү дархан аварга Г.Өсөхбаяр, улсын аварга Г.Эрхэмбаяр, улсын заан Ц.Магалжав нар нэрээ татсанаар УИХ-ын гишүүн Б.Бат-эрдэнэ нийт ирцийн 98 хувийн саналаар үндэсний бөхийн холбоог удирдах эрхээ олж авлаа.

Мөн Цэцдийн зөвлөлд 91 гишүүний нэрийг дэвшүүлсэнээс 76-г сонгосон юм. Үүнээс нууц санал хураалтаар 44 гишүүнийг сонгожээ.