Монголын үйлдвэрчний эвлэлийн холбооноос тавдугаар сарын 1-нд орон даяар жагсаал зохион байгуулах талаар өнөөдөр мэдээлэл хийлээ.

МҮЭ-ийн холбооны дэд ерөнхийлөгч С.Эрдэнэбат “МҮЭ-ийн холбооноос тавдугаар сарын 01-нд орон даяар жагсаал зохион байгуулах болсноо албан ёсоор мэдэгдэж байна. Хөдөлмөрийн зөвшлийн үндэсний гурван талт хэлэлцээрийн биелэлт, үүн дотроо цалин хөлс нэмэгдүүлэх асуудал, мөн хэлэлцээрт дурдагдсан бусад асуудлаар шаардлага тавьж жагсана. Үндэсний гурван талт хэлэлцээрээр төрийн албан хаагч болон бусад салбарын ажилчдын цалин хөлсийг нэмэгдүүлэх чиглэлээрх асуудалд Засгийн газар хойрго хандаж байгаа. Тэтгэврийг таван жил тутамд дундаж цалингаар тогтоодог байсныг долоон жил болгосон. Энэ нь тэтгэврийн хэмжээг шууд багасгах сөрөг үр нөлөөтэй.

Хөдөлмөр нийгмийн зөвшлийн үндэсний хорооны хурлыг хийх саналыг удаа дараа хүргүүлсэн. Улсын хэлэлцээрээр цалин хөлсний асуудлын шийдлийг хэлэлцэхийг санал болгосон ч харамсалтай нь ажил эхлээгүй байна. Түүнчлэн хөдөлмөрийн хөлсний доод хэмжээг тогтоох хугацаа бол болчихсон. Хуулиараа хөдөлмөрийн хөлсний доод хэмжээг хоёр жил тутамд тогтоох ёстой. Хөдөлмөрийн хөлсний доод хэмжээгээр цалинждаг 6000 орчим иргэн байдаг гэсэн судалгаа байдаг. МҮЭХ-ноос хөдөлмөрийн хөлсний доод хэмжээг ойролцоогоор 40-өөс доошгүй хувиар нэмэгдүүлэх буюу 400 мянган төгрөг болгох шаардлагатай гэж үзэж байна. Сүүлийн жилүүдэд манай улсны хөдөлмөрийн хөлсний доод хэмжээ 100 ам.доллараас хэтрэхгүй байна. Энэ асуудалд Засгийн газар хойрго хандаж байна. Боловсрол, эрүүл мэнд, төрийн үйлчилгээний хүртээмж хүнд байхад Засгийн газар орон тоо цомхотгох бодлого барьж байна.

Хөдөлмөрийн хөлсний доод хэмжээ бага байгаагаас монгол залуус гадаад руу гарах нөхцөл үүсч байна. Хөдөлмөрийн хуулийг хүссэн түвшнээс доогуур тодорхой бүлэглэлийн захиалгаар ажил хийж байгаа хүмүүст халгаатай хууль батлагдах гэж байна. Тиймээс ажил хаялтын хэлбэрт шилжих шаардлага гарч байна. Энэ жагсаалд 10 мянга орчим хүн цуглана гэсэн тооцоо байгаа” гэв.  

Эх сурвалж www.wikimon.mn