Бүгд Найрамдах Намын дарга Б.Жаргалсайхан тэргүүтэй хэсэг нөхөд намынхаа онц их хурлыг ирэх сарын 4,5-нд зохион байгуулах гэж байгаа талаараа мэдээлэл хийлээ.

Монгол Улсын нийт өр 27 тэрбум ам.долларт хүрснийг Буян Жагаа өнөөдөр дуулгалаа. Эдийн засгийн хүндрэлтэй байгаа өнөөгийн нөхцөлд ядуурал, хорт хавдар, амиа хорлолт, архидан согтуурал газар авсан гэнэ. Бид ийм л нийгэмд амьдарч байна хэмээн тэрбээр халаглан ярих. Эдийн засгийн нөхцөл байдал хүндэрсэн нь өнөөгийн дарга, сайд нарын буруу бололтой. Тиймээс үүнийг зогсоох, шударга байж, төрт ёсоо сэргээхийн төлөө иргэдтэй хамтран тэмцэхээ тэр уриаллаа.

Ядууралд хүргэж байгаа гол асуудал ажилгүйдэл гэдгийг  тодорхойлж, боловсролын систем нь гажуудсан, дээд боловсролтой гэх ажилгүй дипломны гол болсон залуусаар нийгэм дүүрлээ. Тэднийг ажиллаж хөдөлмөрлүүлэх, ажлын байраар хангах нь нэн чухал асуудлын нэг гэдгийг онцоллоо. Нийтдээ 170 мянга гаруй оюутан залуус их, дээд боловсрол эзэмшихээр суралцаж байгаа боловч төгсгөөд ажлын байр нь олдохгүй хэнд ч хэрэггүй, диплом хадгалсан нэгэн болгохгүйн тулд төрийн зохицуулалт хэрэгтэй гэдгийг учирлав. Эдийн засгийн хүндрэл, орон тооны цомхотгол зэргээс шалтгаалж  ажлын байрны хүрэлцээ тааруу болсон энэ цагт  шаардлагагүй их дээд сургуулиудаа цөөлөх нь илүү оновчтой аж. Харин чадварлаг ажилчин ангийг бий болгосноор мэргэжилтэй ажилчид улс орныг хөгжүүлэх түлхүүр болно гэж тэрбээр үзэж байна. Түүнчлэн хэвлэлийн эрх чөлөө үгүйлэгдэж байна. Манай хэвлэлийнхнийг бүгдийг нь худалдаад авчихлаа гэж хэлсэн юм. 

Өнөөдрийн нийгэмд гай тарьсан, ирээдүйгээ хорлосон тэр сайд дарга нарт хариуцлага тооцож, нийгмээрээ үүний эсрэг " хөдөлснөөр" амжилтанд хүрэх гэнэ. Тэрбээр энэхүү гаргаж буй саналыг нь иргэд дэмжээсэй хэмээн хүслээ.