Япон улсын Засгийн газар 2018 оны хаврын одон гардуулах гадаадын иргэдийн нэрийг зарлалаа. Наран удсын энэ хүндтэй одонгоор энэ удаа Монгол Улсаас Япон Улсад суух Элчин сайд, Уул уурхайн сайд асан Р.Жигжид, Олон улсын Монгол судлалын холбооны Хүндэт ерөнхийлөгч Д.Төмөртогоо нарыг шагнахаар болжээ.
Р.Жигжидийн хувьд монголоос Япон улсад суралцсан анхны монгол оюутан, Япон Монголын харилцааг нягтруулан хөгжүүлэхэд оруулсан хувь нэмрийг нь үнэлэн “Мандах нар” одонгийн “Алт мөнгөн од” зэрэглэлийн одон хүртээхээр болсон байна. Р.Жигжид Монгол дахь Японд суралцаж төгсөгчдийн JUGAMO нийгэмлэгийн Ерөнхийлөгчөөр ажиллаж байгаад одоо Монгол, Японы харилцааг дэмжих “Түншийн холбоо” нийгэмлэгийн Дэд ерөнхийлөгчөөр ажиллаж байгаа юм.
Доктор Д.Төмөртогоогийн Япон дахь монгол хэлний боловсрол болон Япон, Монгол хоёр орны эрдэм шинжилгээний салбарт оруулсан хувь нэмрийг нь үнэлэн "Мандах нар" одонгийн "Тууз бүхий Алтан туяа" зэрэглэлийн одонгоор шагнаж байгаа юм байна.
МУБИС-ийн дэд захирал, Монгол судлалын хүрээлэнгийн дарга, ШУА-ийн Хэл зохиолын хүрээлэнгийн захирал асан Д.Төмөртогоо өдгөө Олон улсын Монгол судлалын холбооны хүндэт ерөнхийлөгч юм.
