Өнөөдөр Нийслэлийн тээврийн газар болон Нийслэлийн төв захиргааны байр “Хангарьд” ордны урд микро автобусны жолооч нар жагслаа. Нийслэлийн Тээврийн газрын байцаагч нар өчигдөр микроны жолооч нарын үнэмлэхийг хураан авснаас жагсахад хүрсэн гэж  энд ирсэн 200 гаруй жолоочийн төлөөлөл хэллээ. Жагсаал зохион байгуулагчийн нэг "Бичил аян эздийн хоршоон”-ы дарга Г.Баатар  “Өчигдөр Нарантуул чиглэлд явдаг 40-50 микро автобусны гэрчилгээг бүртгэлийн санд байхгүй гэх шалтгаанаар нэг дор хураалаа. Үүнийг бид Тээврийн газрын байцаагчид албан тушаалаа урвуулан ашигласан үйлдэл гэж үзэж байна. Өнгөрсөн жилээс эхлэн 150 гаруй машиныг Нийслэлийн тээврийн газарт бүртгүүлэх гэсэн боловч ямар нэгэн шалтгаан гаргасаар өнөөдрийг хүрсэн. Биднийг үнэхээр  бухимдуулж байна” гэлээ. Үзлэг, оношлогоонд тогтмол хамарсан, стандартын шаардлага хангасан 82 микро автобус л Нийтийн тээврийн газарт бүртгэлтэй байдаг. Маргаашнаас эхлэн үнэмлэхээ хураалгасан микро автобусны жолооч нар тус тусын чиглэлдээ эсэргүүцлийн хөдөлгөөн өрнүүлнэ. Тодорхой шийдэл гаргаж өгөхгүй,  150 гаруй микро автобусыг бүртгэхгүй бол тэмцлийн дараагийн хэлбэрт шилжинэ хэмээн жолооч нар мэдэгдлээ.

Эх сурвалж:http://montsame.mn