“Жакарта-2018” Азийн наадмын Чөлөөт бөхийн тэмцээний эхний өдөр манай эрэгтэй бөхчүүд нэг алт, нэжгээд хүрэл медаль хүртсэн амжилттай өндөрлүүллээ. Тэгвэл маргааш эрэгтэйчүүдийн 125, эмэгтэйчүүдийн 20, 53, 57, 62 жингийн барилдаан болох бөгөөд манай бөхчүүдийн сугалаа хэрхэн таарсныг хүргэе.
125 кг-ын жинд Монголын багийн тугч, ОУХМ Н.Золбоо барилдана. Тэрбээр тэгшитгэлд Тажикистаны Фаркод Анакуловтой таарсан бөгөөд шөвгийн наймд “Лондон-2012” олимпийн наадмын мөнгө, ДАШТ-ий хүрэл медальт, Узбекистаны Давид Мозманашвилитэй барилдана. Түүнийг ялбал Жакартад аваргаа хамгаалахаар ирсэн Ираны Парвиз Хадитай хагас шигшээд таарах магадлалтай байна.
50 кг-ын жинд Азийн АШТ-ий мөнгө, хүрэл медальт ОУХМ Э.Нарангэрэл барилдана. Тэрбээр тэгшитгэлд Тайландын Манлика Эсатитай хүч үзэхээр болсон. Түүнийг ялбал 1/4 шигшээд Узбекистаны Даулетбик Яахшимуратова, Вьетнамын Ти Сиан Нгьен нарын ялсантай барилдана.
53 кг-ын жинд “Будапешт-2013” ДАШТ-ий мөнгөн медальт ОУХМ Э.Сумъяа барилдана. Тэрбээр тэгшитгэлд Энэтхэгийн Пинкитэй учраа таарсан бөгөөд түүнийг ялбал 1/4 шигшээд эзэн орны Деви Улфа, Вьетнамын Ти Ха Фуонг нарын ялсантай барилдана. Хоёр ялбал хагас шигшээд Казахстаны Жулдиз Эшимоватай таарах магадлалтай. Харин өнгөрсөн жилийн Дэлхийн аварга Харүна Окүна, 2016 оны Азийн аварга БНХАУ-ын Пан Киану, энэ жилийн Азийн аварга БНАСАУ-ын Пак Йон Ми нарын шилдгүүд нөгөө хэсэгт нь барилдах аж.
57 кг-ын жинд 23 хүртэлх насны дэлхийн дэд аварга, залуучуудын Дэлхийн болон Азийн аварга ОУХМ А.Батцэцэг барилдана. Тэрбээр шөвгийн наймд Вьетнамын Ти Ли Киутэй хүч үзнэ. Түүнийг ялбал хагас шигшээд энэ жилийн Азийн аварга БНХАУ-ын Пей Шинру, БНСУ-ын Ум Жи Ун нарын ялсантай барилдана.
62 кг-ын жинд өнгөрсөн оны Дэлхийн аварга, энэ жилийн Азийн аварга, гавьяат тамирчин П.Орхон барилдана. Тэрбээр 1/4 шигшээд Вьетнамын Ти Хан Нгьентэй учраа таарлаа. Улмаар хагас шигшээд Олимп, Дэлхийн аварга Рисако Кавайтай хүч үзэхээр боллоо. Нөгөө хэсэгт ДАШТ-ий хүрэл медальт, Азийн хошой аварга Кыргызстаны Айсулуу Тыныбекова, “Рио-2016” олимпийн наадмын хүрэл медальт Энэтхэгийн Сакши Малик, БНХАУ-ын Су Руй, Узбекистаны Набира Эсенбаева, Казахстаны Айюлим Кассимова нарын шилдгүүд багтжээ.
Л.Сайнбаяр