Монголын парапауэрлифтингийн нэгдсэн холбооноос мэдээлэл хийлээ. Энэ сарын 6-аас 13-ны өдрүүдэд Япон улсын Китакюшю хотод зохион байгуулагдсан Ади Номхон далайн орнуудын парапауэрлифтингийн аварга шалгаруулах тэмцээнд манай улсаас хоёр тамирчин оролцож, Монгол Улсын гавьяат тамирчин Э.Содномпилжээ Азийн рекордыг дахин эвдсэн. Тодруулбал, -107 кг-ын жинд 239 шахаж, өөрийн тогтоосон рекордыг 4 кг-аар эвдсэн юм.
Мөн -80 кг-ын жинд Г.Ган-Эрдэнэ зургадугаар байранд шалгарчээ. Дараагийн тэмцээн энэ сарын 18-ны өдөр Арабын Нэгдсэн Эмиратулсад хэвтээ шахалтын Ази тивийн аварга шалгаруулах тэмцээн болох юм байна. Манай улсаас таван тамирчин оролцохоор бэлтгэлдээ гарчээ.
Манай улсад 36 дахь удаагийн пауэрлифтингийн мастеруудын дэлхийн аварга шалгаруулах тэмцээн зохион байгуулагдахаар төлөвлөгджээ. Тэмцээнд 25 орны орноос ирж оролцох аж.
Түүнчлэн ирэх арваннэгдүгээр сарын 4-өөс 10-ны өдрүүдэд пауэрлифтингийн насанд хүрэгчдийн дэлхийн аварга шалгаруулах тэмцээн Швед улсад зохион байгуулагдана. Уг тэмцээнд манай улсаас найман тамирчин оролцох юм.
“Рио 2016” олимпийн наадмын хүрэл медальт, Дэлхийн аваргын алт, мөнгөн медальт, Монгол Улсын гавьяат тамирчин Э.Содномпилжээгээс түүний дараагийн оролцох тэмцээний талаар тодрууллаа.
-Та сая рекордоо шинэчиллээ шүү дээ баяр хүргэе. Сэтгэгдлээсээ хуваалцахгүй юу?
-107 кг-ны жинд түрүүлсэндээ баяртай байна. Энэ жинд Иран болон Хятадын тамирчин орж ирнэ хэмээн төсөөлөлтэй байсан. Ираны тамирчид ер нь л сайн. Манай дасгалжуулагч захиалгаа сайн өгсний үр дүнд нэг кг эвдлээ. Дээшээ амжилтаа ахиулах боломж байсан ч дасгалжуулагч одоохондоо дээшээ цойлохгүй. Ард яваа хүнээсээ ганц хоёр кг-аар тасрах ёстой гэсэн төлөвлөгөөтэй байсан юм. Үүний дагуу Ираны тамирчнаас нэг кг-ын илүү гарлаа. Мөнгөн медаль авсан Ираны тамирчин пауэрлифтингийн Азийн наадамд ирнэ. Ерөнхийдөө гол өрсөлдөгч хэн бэ гэхээр 2020 онд Ираны тамирчинтай өрсөлдөх байх гэсэн төсөөлөл байна.
-Дараагийн тэмцээнийхээ талаар яривал?
- Ирэх сарын 6-аас 13-ны хооронд Индонезийн Жакарта хотод Азийн наадам эхлэх гэж байна. Бэлтгэл сургуулилтаа сайн хангаж оролцоно гэж бодож байна.
-Бэлтгэл сургуулилт хэр явж байна вэ. Хэзээ Индонезийг зорих гэж байна?
-Бэлтгэл сургуулилт сайн байгаа. Сая Азийн аварга бол ерөнхийдаа сорилго тэмцээн байсан гэж болдож байна. Үндэсний шигшээ багийнхан аравдугаар сарын 3-ны өдөр нисэх төлөвлөгөөтэй байгаа юм.
-Удахгүй болох Азийн аварга шалгаруулах тэмцээнд ямар амжилт гаргахыг зорьж байгаа вэ?
-Хичээнэ ээ.
-Дэлхийд чансаагаараа хэддүгээр байранд ордог билээ?
-Нэгдүгээр байранд бичигддэг.
-Тэмцээнд явахад тулгамддаг асуудал юу байдаг вэ. Эдийн засаг гэх мэт?
-Одоогийн хувьд болж байгаа. Монголын парапауэрлифтингийн нэгдсэн холбоо, ШШГЕГ-ын 439 дүгээр анги, Сүлд спорт хороо, Хууль сахиулах их сургууль болон дэмжиж, тусалсан бүх хүмүүстээ баярлалаа гэж хэлье.
-Төрөөс дэмжлэг туслалцаа хэр байдаг вэ?
- Парапауэрлифтингийн спорт нь олимпийн наадам болон паралимпийн наадамд багтсан учраас Үндэсний шигшээ багийн тамирчин гэж явдаг. Зардал мөнгийг улсаас гаргадаг.
Б.Лхам
Сэтгэгдэл (3)