Нийслэлийн 379 жилийн ой, гамшгийн эрсдлийг бууруулах олон улсын өдрийн хүрээнд Сүхбаатар дүүргийн Засаг даргын Тамгын газар Онцгой байдлын хэлтэс хамтран ерөнхий боловсролын ахлах ангийн сурагчдын дунд “Өсвөрийн аврагч-2018” тэмцээнийг зохион байгуулжээ.

Тус тэмцээнийг сурагчдын бие бялдрыг хөгжүүлэх, онцгой байдлын албаны үйл ажиллагааг олон нийтэд сурталчлан таниулах, иргэдэд болзошгүй аюул, ослын үед өөрийгөө болон бусдыг авран хамгаалахад сургаж дадлагажуулах анхан шатны мэдлэг олгох зорилгоор жил бүр уламжлал болгон зохион байгуулдаг байна.

Энэ удаагийн тэмцээнд дүүргийн зургаан сургуулийн баг оролцож гарааны өмнөх үйл ажиллагаа жагсаалын үзлэг, мэдлэг сорих асуулт, хариулт, усанд осолдогчийг аврах, анхны тусламж, хүч тамир, саад давалт, нурангиас аврах ажиллагааны цэгүүдэд даалгавар гүйцэтгэж авхаалж самбаагаа сорин өрсөлджээ.

Нэгдүгээр байранд дөрөв дүгээр сургуулийн “Хар Ирвэс”, Хоёр дугаар байранд 35 дугаар сургуулийн “Өсвөрийн Холбоочин”, Гурав дугаар байранд 16 дугаар сургуулийн “Нарны Жим” баг шалгарч тус бүр алт, мөнгө, хүрэл медаль, Засаг даргын нэрэмжит өргөмжлөл, үнэ бүхий зүйлээр шагнуулсан байна.