Бөхийн төрлүүдийн насанд хүрэгчдийн Дэлхийн аварга шалгаруулах тэмцээн Унгарын Будапешт хотод эхлэхэд 16 хоногийн хугацаа үлдлээ. Тодруулбал, аравдугаар сарын 20-28-ны өдрүүдэд чөлөөт бөхийн тамирчид Унгарт цугларах юм.  Гэвч Монголын шигшээ багийн бүрэлдэхүүнд өөрчлөлт ороод байна. Учир нь өнгөрөгч наймдугаар сард Индонезид болсон Азийн спортын 18-р наадмын чөлөөт бөхийн эмэгтэйчүүдийн 62 кг-ын жинд түрүүлсэн гавьяат тамирчин П.Орхоноос хориотой бодис илэрсэн тул аваргын алтан медалийг нь хүчингүй болгосныг Азийн олимпийн зөвлөл, Азийн наадмыг зохион байгуулах хорооноос мэдэгдсэн. Тиймээс П.Орхон энэ удаагийн ДАШТ-ийг өнжиж, жинд нь Э.Гантуяа оролцохоор болсон байна.

Мөн Хөдөлмөрийн баатар, гавьяат тамирчин С.Батцэцэг Унгарыг зорихоор болжээ. Гэхдээ С.Батцэцэг жин өгсөн 68 кг-ын жинд барилдах бол энэ жинд барилдахаар сонгон шалгаруулалтын тэмцээнээс эрхээ аваад байсан Ш.Түмэнцэцэг гэртээ үлдэхээр болсон байна.

Дараах тамирчид, чөлөөт бөхийн ДАШТ-д оролцохоор бэлтгэлээ хийж байгаа юм байна. Монголын баг тамирчид энэ сарын 16-ны өдөр Унгарыг зорино.

ЭМЭГТЭЙ: 

• 50 кг: Э.Нарангэрэл (Хангарьд) 
• 53 кг: Э.Сумъяа (Хилчин) 
• 55 кг: Э.Даваачимэг (Хилчин) 
• 57 кг: А.Батцэцэг (Хасу-Мегастарс)
• 59 кг:  Б.Шоовдор (Хасу-Мегастарс) 
• 62 кг: Э.Гантуяа (Хилчин) (Энэ жинд өрсөлдөх эрхийг П.Орхон С.Батцэцэгийг сорилго тэмцээнд ялж эрхээ баталгаажуулаад байсан юм.)
• 68 кг: С.Батцэцэг (Хилчин) (Энэ жинд өрсөлдөх эрхээ авсан Ш.Түмэнцэцэг Азийн наадмаас мөнгөн медаль аваад байсан ч түүний оронд С.Батцэцэгийг явуулахаар болсон байна.)
• 72 кг: О.Насанбурмаа (Женко)
• 76 кг: Г.Наранчимэг (Хилчин) тус тус ДАШТ-д барилдахаар болжээ.

Л.Сайнаа