Нийслэлийн прокурорын газраас УИХ-ын гишүүн, Эдийн засгийн хөгжлийн сайдаар ажиллаж байсан Н.Батбаяр болон УИХ-ын гишүүн, Эдийн засгийн байнгийн хорооны даргаар ажиллаж байсан Б.Гарамгайбаатар, Зам тээврийн яамны Авто замын бодлогын хэрэгжилтийг зохицуулах газрын даргаар ажиллаж байсан Р.Онон нарт холбогдох хэрэгт яллах дүгнэлт үйлдэж, энэ сарын 5-ний өдөр шүүхэд шилжүүлсэн юм.

Тэдэнд холбогдох хэргийн урьдчилсан хэлэлцүүлэг маргааш буюу энэ сарын 26-ны өдөр болохоор товлогдсон ч өмгөөлөгчийн хүсэлтээр шүүх хурал хойшиллоо. Хэргийг нэхэн сануулбал, УИХ-ын гишүүн асан Н.Батбаяр нь албаны эрх мэдэл, албан тушаалын байдлаа урвуулан ашиглаж Б.Гарамгайбаатарын үүсгэн байгуулсан “Монроуд” ХХК-д хууль бус давуу байдал олгож улсын төсөвт их хэмжээний хохирол учруулсан гэх хэрэгт тэдгээрийг яллагдагчаар татагдсан юм. Б.Гарамгайбаатар, Н.Батбаяр, Р.Онон нарт 2002 оны Эрүүгийн хуулийн зохих зүйл хэсгийг журамлан мөн хуулийн тусгай ангийн 263 дугаар зүйлийн 263.2 дахь хэсэгт зааснаар яллах дүгнэлт үйлдсэн байна.

С.Нацаг