ЖДҮХС-аас төрийн өндөр албан тушаалтны хамаарал бүхий этгээдүүдэд олгосон зээлийн асуудлаар хуульчид өнөөдөр мэдээлэл хийлээ. Хуульчдын тайлбарласнаар ЖДҮХС-гаас урт хугацаатай хөнгөлөлттэй зээл авсан компаниудын хэргийг хүчингүй болгохоор Захиргааны хэргийн шүүхэд хандсан байна. Үүнээс гадна уг асуудлыг хууль зүйн хүрээнд хэрхэн шийдвэрлэж болох талаар хэлэлцүүлгийг удаа дараа зохион байгуулсан юм. Ингээд хуульчдын байр суурийг нэгтгэн хүргэе.
ХУУЛЬЧ Ж.ЭРХЭМБААТАР: ЗАХИРГААНЫ ХЭРГИЙН ШҮҮХЭД ХАНДСАН
Бид ЖДҮХС-ийн асуудлаар Захиргааны хэргийн анхан, Давж заалдах шатны хоёр шүүхэд хандсан. Сангийн хүрээнд өрнөж буй улс төрийн асуудлын цаадахыг судалтал, ХХААХҮ-ийн сайдын гурван тушаал гарсан байсан. Ингэхээр Засгийн газрын сайдын тушаал гэдэг захиргааны нэг акт. Энэхүү акыг Захиргааны хэргийн шүүхэд нийтийн хөрөнгийг хууль бусаар захиран зарцуулсан асуудлаар ТББ байгууллага шүүхэд хандах эрхтэй. Үүний дагуу анхан шатны шүүхэд хандсан. Мөн ЖДҮ-ийн сан өөрөө төсөл сонгон шалгаруулах журам баталсан. Харин энэ журамд хоёр өөрчлөлтийг оруулснаар өмнө нь зээлийн төсөлд тэнцсэн байсан боловч эх үүсвэр нь хүлээгдэж байсан аж ахуйн нэгжийг төсвөөс санхүүжих боломжийг нь хааж, шинээр төсөл авах буюу маргаан дагуулах замаар 124 нэр бүхий аж ахуй нэгжийн зээл олгох үүд хаалгыг хаасан тушаал гарсан. Тиймээс энэ зүгээр нэг яриад өнгөрөх асуудал биш. Залуу хуульчдын өнцгөөс харахад бүгд хуулийн байгууллагаар шалгагдаж, зөв зохистой шийдвэрлэгдэх ёстой. Үүнийг зүгээр улс төрийн хэрүүл байдлаар ажиглан, харж суух боломж байхгүй. Тиймээс хууль бус гэдэг нь батлагдчихсан хэргүүдэд хууль ёсны арга хэмжээ авч, тэмцэх боломж байна.
ХУУЛЬЧ, СУДЛААЧ Х.НОМИНГЭРЭЛ: ХУУЛЬ БУС ГЭДЭГ НЬ БАТЛАГДЧИХСАН ХЭРГҮҮДТЭЙ ТЭМЦЭХ ЁСТОЙ
“Сүүлийн хоёр сар үргэлжилж байгаа нөхцөл байдлын хүрээнд олон баримтууд тодорхой болж байна. Одоогоор хуулийн байгууллагууд шалгаж тодорхой болгоогүй ч гэсэн гэмт хэрэг, хууль зөрчсөн шинжтэй олон зүйл их хурлын танхимд өрнөсөн нь хэвлэлээр тодорхой болж байна.
ӨМГӨӨЛӨГЧ Б.МЭРГЭН: НИЙТИЙН ӨМЧИЙГ ХАМГААЛНА
“Хуульч, судлаачид нэгдэн нийтийн эрх ашгийн төлөө явуулж байгаа үйл ажиллагааны нэг нь ЖДҮХС-аас урт хугацаатай, хөнгөлөлттэй зээл олгосон албан тушаалтны шийдвэрийг хүчингүй болгуулахаар Захиргааны хэргийн шүүхэд хандсан. Үүнтэй холбогдуулан “Онч шийдэл” төрийн бус байгууллага нь нийтийн өмчийг хамгаалах үүднээс ХХААХҮ-ийн сайдад холбогдуулан хоёр төрлийн нэхэмжлэлийн шаардлага гаргасан. Үүнд “ХХААХҮ”-ийн сайдын 2018 оны тавдугаар сарын 14-ний өдөр “Төсөлд дэмжлэг үзүүлэх тухай” А/88 тоот тушаалын 1-р хавсралтаар санхүүжүүлэх төслийн жагсаалтыг баталсан ба уг жагсаалтаар төрийн өндөр албан тушаалтан буюу Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 20 дугаар зүйлийн 20.2-д багтсан албан тушаалтнуудад “ЖДҮХС-аас зээл авах эрх” үүссэн явдал юм.
Уг нэхэмжлэлийг гаргаснаар хуулийн хэрэгжилт хангагдаж, нийтийн өмчид хууль бусаар халдсан үйлдлийг шүүхээр тогтоолгож, хууль бус захиргааны актыг хүчингүй болгож, буруутай этгээдээр хохирлыг нөхөн төлүүлэх хууль зүйн үндэслэл бий болох мөн хууль бус шийдвэрийн үндсэн дээр олгогдсон зээлийг буцаан төлүүлэх, улмаар төсөл нь тэнцсэн боловч зээлийн санхүүжилтийг хүлээж байсан жижиг дунд эрхлэгчдэд буюу бодит зээл олгогдох эрх зүйн үр дагавар үүсэх юм. АТГ-аас авсан мэдээллээр ЖДҮХС-ийн сонгон шалгаруулах хорооноос дэмжигдсэн боловч санхүүжилт хүрэлцээгүйн улмаас санхүүжилтээ авч чадаагүй 300 гаруй төсөл байна. Бүхий л төрийн байгууллагын үйл ажиллагаа үндсэн хуулийн хүрээнд явагддаг. Хэрвээ ЖДҮХС-аас зээл авсан гишүүдийн гэм буруутай нь тогтоогдвол улс төрийн болон хуулийн, ёс зүйн хариуцлага хүлээх ёстой.
Гишүүд авлигын эсрэг хууль, ашиг сонирхлын зөрчлийн тухай хууль, УИХ-ын тухай хуулийн 10 гаруй заалтыг зөрчсөн нь нийтэд илэрхий байгаа” гэв.
Г.Нацаг
