Хүнс, хөдөө аж ахуй, хөнгөн үйлдвэрийн дэд сайд Ж.Сауле өнгөрсөн ням гаригт ХБНГУ-ын Берлин хотноо зохиогдсон Хөдөө аж ахуйн сайд нарын дээд хэмжээний 11 дэх удаагийн чуулга уулзалтад оролцжээ.
Уулзалтад "Дижитал тоон үзүүлэлттэй хөдөө аж ахуй-ирээдүйн хөдөө аж ахуйд зориулсан ухаалаг шийдлүүд" сэдвийн дор дэлхийн нийт 75 орны Хөдөө аж ахуйн сайд нар оролцсон байна. Энэ үеэр сайд нар "Дижитал тоон технологийн боломжийг тодорхойлох, ашиглах", "Цахим технологид суурилсан фермерүүдийн хүртээмжийг өргөжүүлж хамгаалах", "Мэдээллийн аюулгүй байдал, өгөгдлийн бүрэн бүтэн байдлыг хангах", "Хөдөө аж ахуй, хөдөөгийн хөгжлийн бүтцийн өөрчлөлтийг хангах" зэрэг сэдвүүдээр хуралдсан байна.
Түүнчлэн дэд сайд Ж.Сауле зарим орны төлөөлөгчидтэй хамтын ажиллагаагаа өргөжүүлэхээр тохиролцжээ. Тодруулбал, ХБНГУ, Беларусь, Канад, Казакстан, БНХАУ, Франц, Монтенегро зэрэг улсын хөдөө аж ахуйн салбарын удирдлагуудтай уулзжээ. ХБНГУ-ын Холбооны Хүнс, хөдөө аж ахуйн яамны Төрийн нарийн бичгийн дарга Михиал Штюбгентэй хийсэн уулзалтын хүрээнд Монгол-Германы хамтын ажиллагааны "Тогтвортой хөдөө аж ахуй" төслийн гуравдугаар үе шатыг амжилттай хэрэгжүүлэхэд талууд идэвх санаачилга гарган, хамтран ажиллахаар тохиролцсон байна.
Мөн Беларусь Улсын Хөдөө аж ахуйн дэд сайд Гракунтай уулзаж, газар тариалангийн салбарт ашиглаж буй техник, тоног төхөөрөмжийг импортлоход тулгамдаж буй асуудал, эрчимжсэн мал аж ахуйг бий болгох, сүү, сүүн бүтээгдэхүүн үйлдвэрлэх үйлдвэрийг хамтран байгуулах боломжийн талаар хэлэлцлээ.
