Монголын үндэсний бөхийн холбооны тамга тэмдгийн төлөө хэсэг бүлэг хүн маргалдаж, бөхчүүд өргөөндөө барилдах боломжгүйдээ хүртэл хурцадсан. Жил дамнасан маргааныг нэг тийш болгохоор олон санал санаачлага өрнүүлсэн ч үр дүнд хүрээгүй. Тэгвэл өнөөдөр энэ асуудалд цэг тавихаар улсын өндөр цолтой бөхчүүд, бөхийн зүтгэлтнүүд "Ойлголцлын санамж бичиг"-т гарын үсэг зурсан байна. Дархан аварга Х.Баянмөнх, Б.Бат-Эрдэнэ, Г.Өсөхбаяр, улсын аварга Н.Батсуурь нарын бөхчүүд болон Хөдөлмөрийн баатар Л.Чинбат, соёлын гавьяат зүтгэлтэн Ү.Хүрэлбаатар нар уулзжээ. Энэ хүрээнд МҮБХ-ны Их Эеийн хурлыг хоёрдугаар сарын 16-нд хийхээр тогтож, дархан аварга Х.Баянмөнх, Б.Бат-Эрдэнэ нар хурлыг ахлахаар болсон байна. Мөн монгол түмний уламжлалт баяр Цагаан сарын бөхийн барилдааныг Монгол бөхийн өргөөнд зохион байгуулахаар талууд нэгджээ.

Дээр дурдсан "Ойлголцлын санамж бичигт:

Бөхчүүдийн олон жилийн турш үргэлжилсэн талцал, хуваагдлыг эцэс болгох,

-Монгол бөхийн барилдаанд бий болоод байгаа допинг, цолны найрааны асуудлыг таслан зогсоох,

-Бөхчүүдийг цалин хөлс, нийгмийн даатгал, тэтгэвэр, тэтгэмжтэй болгох, бөхчүүүдийн нийгмийн асуудлыг шийдвэрлэх

-Монголын нийт бөхчүүд, бөх сонирхогчид, ард иргэдийн хандиваар боссон “Бөхийн өргөө”-ний өмчлөх эрхийг МҮБХ ТББ-ын нэр дээр бүртгүүлэх,

-Бөхийн холбооны санхүүгийн үйл ажиллагаа, орлого, зарлагыг нийтэд ил тод болгох, үйл ажиллагааг улам боловсронгуй болгох,

-Найраа хийж, худал барилдсан, худлаа унаж өгсөн бөхчүүдийн цолыг хасч, хариуцлагыг өндөржүүлж, ёс жудаг, сахилга батыг дээшлүүлэх,

-“Бөхийн өргөө”-г түшиглэн бөхчүүдэд зориулан Хөгжлийн төв байгуулах зэрэг асуудал багтжээ.