УИХ-ын гишүүн асан Н.Батбаяр, Б.Гарамгайбаатар нарыг АТГ-аас шалгаж, яллагдагчаар татах саналаа прокрорт хүргүүлсний дагуу тэдэн холбогдох хэргийн шүүх хурал өнөөдөр болохоор товлогдсон байсан. Гэсэн ч сайд асан Н.Батбаярын шинэ өмгөөлөгч Л.Данзанноров, Б.Мөнхбат нар нь хэргийн материалтай танилцах тул шүүх хурлыг хойшлуулах хүсэлт гаргасан байна. Шүүхээс уг хүсэлтийг хүлээж аван ирэх сарын 15-ны өдрийн 09.30 минут болтол шүүх хурлыг хойшлууллаа.

Б.Гарамгайбаатар, Н.Батбаяр, Р.Онон нарт холбогдох хэргийг нэхэн сануулбал, Эдийн засгийн хөгжлийн сайд асан Н.Батбаяр нь “Чингис”, "Самурай” бондын мөнгийг захиран зарцуулахдаа албан тушаалын байдлаа урвуулан ашигласан гэх хэрэгт буруутгагдан шалгагдсан юм. Харин Б.Гарамгайбаатарын хувьд бондын мөнгөнөөс их хэмжээний зээл авч өөрийн компани руугаа оруулсан, зээлээ эргэн төлөөгүй гэх асуудлаар шалгуулж дуусчээ.Тэдэнд Эрүүгийн хуулийн тусгай ангийн 150.3, 263.2-т заасны дагуу яллагдагчаар татсан юм.

Г.Нацаг