Алтанбулаг автозамын хилийн шалган нэвтрүүлэх боомтоор энэ сарын 20-ны өдөр Монгол Улсын иргэн У нь өөрийн найз Я-гийн гадаад паспортыг ашиглан улсын хил зөрчжээ. Уг хэргийг Сэлэнгэ аймгийн Сүхбаатар сум дахь Хилийн 0101 дүгээр ангийн Алтанбулаг шалган нэвтрүүлэх заставын баримт бичгийн шалгагч, дэслэгч Б.Энхзаяа илрүүлсэн байна.

Иргэн У нь Улаанбаатар хотын Сонгинохайрхан дүүрэгт оршин суудаг бөгөөд өөрийн гадаад паспортын хүчинтэй хугацаа дууссан тул найз Я-гийн гадаад паспортыг ашиглан хил зөрчсөн аж. Дэслэгч Б.Энхзаяа нь гадаад паспорт эзэмшигчийн зургийг У нүүрний төрхтэй сайтар харьцуулалт хийн сэжигтэй санагдсан тул саатуулсан байна. Албаны өндөр ур чадвар гарган хил зөрчигчийг илрүүлсэн дэслэгч Б.Энхзаяаг Хил хамгаалах ерөнхий газрын даргын тушаалаар “Хилчний алдар III” тэмдгээр шагнажээ.

Г.Нацаг