“Mongolia’s next top model” нэвтрүүлгийн шилдэг оролцогч, загвар өмсөгч Ч.Чамин-Эрдэнэ өндрөөс унаж амиа алдсан хэрэг өнгөрөгч 2018 оны аравдугаар сарын 24-ний өдөр гарсан. Уг хэргийг Хан-Уул дүүргийн Цагдаагийн нэгдүгээр хэлтэст шалгаж дууссан бөгөөд шалгалтын талаарх мэдээллийг ЦЕГ-ийн Мөрдөн байцаах албаны дарга Д.Отгонжаргал өглөө. Тэрбээр “Иргэн Ч.Чамин-Эрдэнэ амь насаа алдсан хэргийн шалгалтын ажиллагаа дууссан. Хохирогчийн талаас өмгөөлөгчтд хавтаст хэрэгтэй биелчлэн танилцсан. Энэ хэргийг хувийн байдал, хань харилцаа, хэн хэн хамт байсан талаар өргөн хүрээтэй гурван сарын хугацаанд шалгаж ажиллаа. Энэ гэмт хэргийг үйлдсэн этгээдийг шалгахгүй байна гэх мэдээлэл цацагдсан. Тодорхой сэжиг таамгуудыг шалгасан ч тийм асуудал тогтоогдоогүй. Энэ хэрэгт хэн нэгэн хөрөнгө чинээтэй албан тушаалтан нөлөөлсөн зүйл байхгүй. Бид хэн нэгний нөлөөнд автаж хүний амь нас хохирсон хэрэг дээр нотлох баримтыг нуувал эрүүгийн хариуцлага хүлээнэ. Эрүүгийн хэргийн оролцогчид нэр дурдах боломжгүй буюу сэжигтнээр тооцох үндэслэл бүхий гэм буруутай хүн тогтоогдоогүй. Хэргийн газрын үзлэгээр цогцос олдсон газар нь хүний хөдөлгөөн бага, барилга барих зориулалттай хоосон хашаа байсан. Цогцос олдсон газар, түүний эргэн тойрон дахь байдлыг шалгаж, тус байрны 11-14 давхарт үзлэг хийсэн. Үзлэг хийх явцад тагт онгорхой байсан. Мөрдөн байцаалтын туршилт явуулж цонхны онгойх хэмжээ ямар байв, үүгээр хүн багтах эсэхэд туршилт явуулахад хүний бие багтах боломжтой гэдгийг мөрдөн байцаалтаар тогтоосон” гэв.