"Номин талс" хамтлагийн дуучин А.Хаянхярваа нийслэлийн Хөрөнгө оруулалтын газрын Хөрөнгө оруулалт, төлөвлөлт хариуцсан орлогч даргын албыг хашаад багагүй хугацаа өнгөрсөн. Төрийн алба хашиж буй хэнбугай ч АТГ-т хөрөнгө орлогоо үнэн зөвөөр мэдээллэх үүрэгтэй. Гэтэл уг үүргээ эрхэм дуучин, газрын дарга эрхэм маань умартсан бололтой. Тодруулбал, АТГ-аас хийсэн хөрөнгө орлогын мэдүүлгийн хянан шалгалтаар түүнтэй холбоотой хэд хэдэн зөрчлүүд илэрсэн тухай мэдээлэл хэвлэлээр гарлаа. Тодруулбал, тэрбээр Баянзүрх дүүргийн нутаг дэвсгэр дэх үл хөдлөх эд хөрөнгөө түрээслүүлсэн нийт 36 сая төгрөгийн орлогоосоо 24 сая төгрөгийг нь “Хөрөнгийн орлого” хэсэгт мэдүүлээгүй гэжээ. Мөн “Lexus RX-350” маркийн автомашиныг худалдсан 15 сая төгрөгийн орлогоо “Хөрөнгө борлуулсны орлого” хэсэгт мэдүүлээгүй бол “Төрийн банк” дахь дансаар хүлээн авсан 20 сая төгрөгийн цалингийн зээлийг мэдүүлгийн "Зээл" хэсэгт тус тус мэдүүлээгүй тухай мэдээлэл цацагдсан юм. Түүнчлэн мэдүүлгийн “үйл ажиллагааны орлого” хэсэгт 50 сая төгрөгийн орлогыг үндэслэлгүйгээр илүү мэдүүлсэн нь тогтоогдсон боловч Нийслэлийн Хөрөнгө оруулалтын газрын даргын шийдвэрээр цалин бууруулах арга хэмжээ авсан байна. Уг хуульд заасны дагуу ажлаас чөлөөлөх хүртэл хариуцлага тооцох заалттай байдаг ажээ.