Оюутолгойн гэрээг хийхдээ Айвенхоу майнзын хувьцаа эзэмшигч байсан нь тогтоогдсон С.Баярцогтыг Сүхбаатар дүүргийн Анхан шатны шүүхээс суллах шийдвэрийг өнөөдөр орой гаргасан байна. Тодруулбал, энэ сарын эхээр С.Баярцогтыг АТГ-ын мөрдөн байцаалтын явцад нэг сая ам.долларын хадгаламжтай оффшор данс, Оюутолгойн асуудлаар шинэ үйлдлүүд илэрсэнтэй холбогдуулан баривчлан хорьсон юм.

С.Баярцогтыг Оюу толгой төсөлтэй холбогдох гэрээ, эрх зүйн баримт бичгүүдийг батлахдаа эрх мэдэл, албан тушаалын байдлаа урвуулан ашиглаж илт хууль бус шийдвэр гаргаж бусдад давуу байдал олгосон байж болзошгүй хэрэгт холбогдуулан шалгаж байгаа. Үүнээс өмнө өнгөрсөн 2018 оны гуравдугаар сард баривчлан 74 хоног хорьсон боловч шүүхийн шийдвэрээр батлан даалтад гаргасан байдаг. Ингээд гадуур шалгаж байгаад энэ сарын эхээр дахин цагдан хорьсон юм. Тэгвэл өнгөрсөн баасан гаригт АТГ-ын Мөрдөн шалгах хэлтсийн дарга, Эрхэлсэн комиссар Э.Идэрцог “Сангийн сайд асан С.Баярцогтын тухайд хэрэгтэй холбоотой шинэ нөхцөл байдал тогтоогдсон учраас цагдан мөрдөн шалгах ажиллагаа явуулж байна.

Гэрээ байгуулахаас өмнө Оюутолгойн хувьцаа эзэмшиж байгаад гэрээ байгуулсны дараа хувьцаагаа худалдаж их хэмжээний ашиг олсон зэрэг байдал давуу байдал тогтоогдож байгаа учраас шалгаж байгаа” гэж мэдээлж байсан. Эндээс үзвэл, С.Баярцогтод холбогдох хэрэг улам хүндэрсэн байх талтай гэж ойлгогдсон боловч шүүхээс өнөөдөр түүнийг ийнхүү суллах шийдвэр гаргасан нь хэрэг үнэн мөнөөр шийдэгдэх эсэх болов уу гэсэн эргэлзээ төрүүлэхэд хүргээд байна. Юутай ч шүүхээс Сангийн сайд асан С.Баярцогтыг суллах шийдвэрийг өнөөдөр гаргалаа. Гэхдээ түүнийг ямар үндэслэлээр сулласныг бид нэхэн сурвалжлах болно.

Г.Нацаг-Эрдэнэ