Өмнөд Солонгосын алдартнууд дасгалжуулагч, найруулагч нартаа хүчирхийлүүлж байсан талаарх мэдээллээ олон нийтэд ил болгосноос хойш олон нийтийн дунд дуулиан тариад буй. Тэгвэл уг дуулианы дараагийн эзнээр тодроод байсан гүйлтийн тэшүүрийн шигшээ багийн дасгалжуулагч Чой Жэ Бумыг тамирчнаа хүчирхийлж, бэлгийн дарамт үзүүлсэн, бие болон сэтгэл санааны хохирол учруулсан гэж буруутгаж, 18 сарын ял оноожээ. Дасгалжуулагч Чой Жэ Бумийн удирдлага дор бэлтгэл сургуулилт хийдэг байсан шорт-трекийн нэрт тамирчин Шим Сук Хи өнгөрөгч онд гомдол гаргасан юм.
Тухайн үед шүүхээс 10 сарын ял оноосон ч олон нийтийн зүгээс хүчтэй эсэргүүцэлтэй тулгарсан байдаг. 2014, 2018 оны өвлийн олимпийн эмэгтэйчүүдийн 3000 метрийн шорт-трек төрөлд алтан медаль хүртсэн 21 настай тамирчин бүсгүй "Дасгалжуулагч үргэлж зодож, хэл амаар доромжлилдог байсан. Тэр бүхнийг тэвчих амаргүй байсан. Тэр бас миний биед зөвшөөрөлгүй хүрэхээс гадна бэлгийн дарамт үзүүлсэн" гэж мэдүүлжээ. Үүнээс гадна гэрч нарын мэдүүлснээр "Пёнчан"-ы өвлийн олимпийн өмнөх нь тамирчны толгой руу хурц үзүүртэй зүйлээр чанга цохисныг гэрчилсэн байна.
Хохирогчийн өмгөөлөгч "Үнэхээр итгэхийн аргагүй юм. Дасгалжуулагч, хохирогчийг 17 настай байхаас нь бэлгийн дарамт үзүүлж, сэтгэл санааны хохирол учруулж байсан. Биед нь хүнд гэмтэл учруулж, эмэгтэй хүнийг хэл амаар байнга доромжилдог байсан. Гэтэл шүүхээс түүнд ийм хөнгөн ял оноолоо гэж үү. Шүүхийн шийдвэрт үнэхээр урам хугарлаа" гэжээ.
