ОХУ-ын Сахалин мужийн Южно-Сахалин хотод хоёрдугаар сарын 8-17-нд “Азийн хүүхдүүд” өвлийн спортын анхдугаар наадам болно. Хүүхэд багачууд, залуу үеийнхэнд олимпизмийн үзэл санааг сурталчлан таниулах, өвлийн спортыг түгээн дэлгэрүүлэх, олон улсын спортын хамтын ажиллагааг бэхжүүлэх хүрээнд энэхүү наадмыг зохион байгуулж буй.

Азийн олимпийн зөвлөлийн гишүүн орнууд, Москва хот, Урал, Сибир, Саха, Алс Дорнод, Башкортостан, Татарстан болон Сахалинск мужийн нийт 20 гаруй багийн 1500 гаруй тамирчин спортын найман төрлөөр өрсөлдөхөө мэдүүлжээ.

Тэгвэл өнөөдөр "Сахалин-2019" өвлийн спортын наадамд оролцох Монголын баг тамирчдад хүндэтгэл үзүүлж, туг гардуулах ёслол болсон бөгөөд Монголын багийн ахлагчаар МҮОХ-ны Гүйцэтгэх зөвлөлийн гишүүн Ч.Амарсанаа ажиллах юм байна. Энэхүү наадамд эх орноо төлөөлөн уулын цана, гүйлтийн цана, биатлон, тэшүүрийн төрөлд нийт 13 тамирчин оролцох бөгөөд баг тамирчдын замын зардал болон багийн нэгдсэн хувцсыг ЗХАГ БТСГ-аас санхүүжуулсан байна.

Б.Жаргал