Өнөө жилийн Цагаан сарын барилдаан сайхан болж өндөрлөв. Ёстой л наадам хүртэл ярих ярианы сэдэвтэй болсон. Тэр дундаа бөхийн шинэ үе хүчтэй сэлгэж буйг түмэн олон энэ барилдаанаас үзлээ.

Тэдний нэг бол аймгийн залуу арслан Б.Лхагвадорж. 17-хон насандаа аймагтаа түрүүлснээр бөхийн хүрээнийхний анхаарлыг татаж, заалны барилдаанд том цолтнуудын шүдний өвчин болоод удаж байгаа. Сая болсон Цагаан сарын барилдааны үеэр отгон аваргатай ана мана үзэж, ирээдүйтэй бөх болохоо харууллаа. Түүнд дархан аварга А.Сүхбат "Ирээдүйн аварга" шагналаа гардуулсанд түмэн олон "нүдээ олсон шагнал байлаа" хэмээн ам булаалдан ярьж байна.

Энэ шагналыг 13 бөх хүртэсний дотор аймгийн хурц арслан Э.Ууганбаяр, аймгийн арслан Ш.Пүрэвгарьдаас бусад нь улсын цол авсан. Тэдгээрээс гурав нь наадмын түрүү авсан бол Б.Лхагвадорж шагнал авсан бөхчүүдээс хамгийн залуу нь юм.

Б.Жаргал