Азийн 23 хүртэлх насны насанд хүрэгчдийн аварга шалгаруулах анхдугаар тэмцээн ирэх сарын 23-нд нийслэл хотод зохион байгуулагдахаар болжээ.

Харин тус тэмцээнд оролцох Монгол Улсын баг тамирчдыг сонгох сорил тэмцээн өчигдөр боллоо. Тэмцээнд нийт 20 байгууллагын 186 тамирчин 10 жинд өрсөлдсөнөөс 57 кг-ын жинд өнгөрсөн жилийн УАШТ-ий мөнгөн медальт, спортын мастер Ц.Чинзориг доод жиндээ хүч үзэж, өсвөр үеийн ДАШТ-ий хүрэл медальт, Азийн аварга ОУХМ З.Занабазар, өсвөр үе, залуучуудын Азийн АШТ-ий хүрэл медальт Б.Ариунболд, залуучуудын Азийн АШТ-ий мөнгөн медальт Б.Түмэнцогт нарын шилдгүүдийг ялж аваргаллаа.

Өнгөрсөн жилийн насанд хүрэгчдийн 57 кг-ын жингийн аварга ОУХМ Ц.Цогбадрах дээд жиндээ буюу 61 кг-ын жинд, өсвөр үеийн Азийн аварга ОУХМ Т.Тулга 65 кг-д, залуучуудын ДАШТ-ий хүрэл медальт ОУХМ Э.Тэмүүлэн 70 кг-д, залуучуудын Азийн АШТ-ий мөнгөн медальт ОУХМ М.Лхагвагэрэл 125 кг-д бүх өрсөлдөгчөө цэвэр ялж аварга болцгоов. Эмэгтэйчүүдийн хамгийн хөнгөн жинд өнгөрсөн жилийн “U-23”-ын ДАШТ-ий хүрэл медальт Ц.Намуунцэцэг Б.Чимгээ, Н.Анударь, Ч.Отгонтуяа, Н.Азжаргал нарыг туршлага заан ялж түрүүллээ.

Б.Жаргал