ОХУ-ын Красноярск хотод өвлийн XXIX Универсиад наадам болж байна. Энэ сарын 1-нд эхэлсэн тус наадамд дэлхийн 58 орны 3800 оюутан тамирчин оролцож буй. Тус наадамд манай тамирчид анх удаагаа спортын таван төрөлд өрсөлдөж байна. Универсиадын уран гулгалтын эмэгтэйчүүдийн ганцаарчилсан төрлийн богино үзүүлбэр өчигдөр болж, 35 тамирчнаас 24 нь чөлөөт үзүүлбэрт өрсөлдөх эрхийг авсан юм.
Манай улсын тамирчин Г.Марал-Эрдэнэ 24.75 оноог авч 30-р байрт орсноор чөлөөт үзүүлбэрт өрсөлдөх эрхийг авч чадаагүй юм. Хэдийгээр тэрбээр эрх авч чадаагүй ч гэлээ түүний гаргасан эд амжилт нь манай улсын хувьд түүхийн шинэ хуудас юм. Г.Марал-Эрдэнийн ард Индонез, Исланд, Филиппин, Малайз, Бразилын чадварлаг тамирчид орсон байна. Ирээдүйн шинэ өнгөөр тодроод буй Г.Марал-Эрдэнэ нь Япон Улсад дасгалжуулагч Козука Сачикогийн удирдлагад бэлтгэлээ хийдэг байна.
Универсиад наадмын уран гулгалтын эмэгтэйчүүдийн ганцаарчилсан төрлийн чөлөөт үзүүлбэр маргааш болж, медальтнууд тодорно.
Б.Жаргал
Сэтгэгдэл (9)